ದಾವಣಗೆರೆ

ಸರಕಾರ ಭತ್ತ ಖರೀದಿ ಕೇಂದ್ರ ಘೋಷಿಸಿದ ಬೆನ್ನಲ್ಲೇ ಮಾರುಕಟ್ಟೆಯಲ್ಲೂ ಬೆಲೆ ಜಿಗಿದಿದೆ. ಮೂರ್ನಾಲ್ಕು ದಿನದಿಂದ ಭತ್ತದ ಬೆಲೆ ಏರಿಕೆಯಾಗುತ್ತಿದ್ದು, ಬುಧವಾರ ಮಾರಕಟ್ಟೆಯಲ್ಲಿ ಕ್ವಿಂಟಾಲ್‌ ಭತ್ತ 1850 ರೂ.ಗೆ ಮಾರಾಟ ಆಗಿದೆ. 2310 ರೂ. ವರೆಗೂ ಗರಿಷ್ಟ ಬೆಲೆ ದೊರೆತಿದೆ.

ಸರಕಾರ ಭತ್ತಕ್ಕೆ ಬೆಂಬಲ ಬೆಲೆ ನೀಡಿ ಖರೀದಿ ಕೇಂದ್ರ ತೆರೆಯುವ ಘೋಷಣೆ ಹೊರಡಿಸಿತ್ತು. ಡಿ.5 ರ ಬುಧವಾರದಿಂದ ಭತ್ತ ಖರೀದಿಗೆ ರೈತರಿಂದ ನೋಂದಣಿಯೂ ಆರಂಭವಾಗಿದೆ. ಈ ನಡುವೆ ಮಾರುಕಟ್ಟೆಯಲ್ಲಿ ಭತ್ತದ ಬೆಲೆ ನಿರಂತರವಾಗಿ ಏರಿಕೆ ಕಾಣುತ್ತಲೇ ಇದೆ. ಬೆಂಬಲ ಬೆಲೆ ಘೋಷಣೆಯ ಉದ್ದೇಶ ಕೂಡ ಮಾರುಕಟ್ಟೆಯಲ್ಲಿ ಬೆಲೆ ಕುಸಿಯದಂತೆ ತಡೆದು ಸ್ಥಿರತೆ ತರುವುದಾಗಿದ್ದು, ಈ ಗುರಿ ಈಗ ಈಡೇರುತ್ತಿದೆ.

1850 ರೂ.ಗೆ ಮಾರಾಟ

ಖರೀದಿ ಕೇಂದ್ರ ಘೋಷಣೆಗೂ ಮುನ್ನ ಮಾರುಕಟ್ಟೆಯಲ್ಲಿ ಸಾಧಾರಣ ಬೆಲೆಯಿತ್ತು. ಸುಗ್ಗಿ ಆರಂಭವಾದಾಗಿನಿಂದಲೂ ಬೆಲೆ ಏರಿಕೆ ಕಂಡಿರಲಿಲ್ಲ. ಕಳೆದ ವಾರ ಕನಿಷ್ಟ 1500, ಗರಿಷ್ಠ 2020 ರೂ. ಬೆಲೆಯಿತ್ತು. ಆವಕದ ಮಾದರಿ ಬೆಲೆ 1740 ರೂ. ದಾಟಿರಲಿಲ್ಲ. ಬುಧವಾರ ದಾವಣಗೆರೆ ಎಪಿಎಂಸಿಯಲ್ಲಿ ಕನಿಷ್ಟ 1500 ರೂ. ನಿಂದ 2310 ರೂ. ವರೆಗೂ ಗರಿಷ್ಟ ಬೆಲೆ ಕಂಡು ಬಂದಿದೆ. 1850 ರೂ. ಬೆಲೆಗೆ ಹೆಚ್ಚಿನ ಭತ್ತ ಮಾರಾಟ ಆಗಿದೆ.

ಕೇಂದ್ರದ ಬೆಂಬಲ 1770 ರೂ.

ಕೇಂದ್ರ ಸರಕಾರ ಸಾಮಾನ್ಯ ಭತ್ತಕ್ಕೆ 1750 ರೂ. ಎ ಗ್ರೇಡ್‌ ಭತ್ತಕ್ಕೆ 1770 ರೂ. ಬೆಂಬಲ ಬೆಲೆ ಘೋಷಿಸಿತ್ತು. ಆದರೆ ರಾಜ್ಯ ಸರಕಾರ ಖರೀದಿ ಕೇಂದ್ರ ತೆರೆಯುವ ಬಗ್ಗೆ ಸಕಾಲದಲ್ಲಿ ಮುಂದಾಗಲಿಲ್ಲ . ಹಲವು ಹೋರಾಟ, ಒತ್ತಡದ ನಂತರ ರಾಜ್ಯ ಸರಕಾರ ಇದೇ ಬೆಂಬಲ ಬೆಲೆಯಡಿ ಭತ್ತ ಖರೀದಿಸುವ ನಿರ್ಣಯ ಕೈಗೊಂಡು ಖರೀದಿ ಕೇಂದ್ರ ಆರಂಭಿಸುವ ಘೋಷಣೆ ಹೊರಡಿಸಿತ್ತು.

ರೈತನಿಗೆ ನೂರು ರೂ. ಹೆಚ್ಚಳ

ಘೋಷಣೆ ಹೊರ ಬಿದ್ದ ಬೆನ್ನಲ್ಲೇ ಮಾರುಕಟ್ಟೆಯಲ್ಲಿ ಬೆಲೆ ಏರುತ್ತಿದೆ. ಕೇಂದ್ರ ಸರಕಾರ ಘೋಷಿಸಿರುವ ಅಂದರೆ ಖರೀದಿ ಕೇಂದ್ರದಲ್ಲಿ ನೀಡುವ ಬೆಲೆಗಿಂತ ನೂರು ರೂ. ಹೆಚ್ಚಿನ ಬೆಲೆ ರೈತರಿಗೆ ಸಿಗುತ್ತಿದೆ. ಮಾರುಕಟ್ಟೆಯಲ್ಲಿ ಇದೇ ಬೆಲೆ ಒಂದಿಷ್ಟು ದಿನ ಮುಂದುವರಿಯಬೇಕು ಎಂದರೆ ರಾಜ್ಯ ಸರಕಾರ ಖರೀದಿ ಕೇಂದ್ರ ಆರಂಭಿಸಬೇಕು. ಏಕೆಂದರೆ ಇನ್ನೂ ಖರೀದಿ ಕೇಂದ್ರಗಳು ಆರಂಭವಾಗಿಲ್ಲ, ಈಗ ರೈತರ ನೋಂದಣಿ ಆರಂಭವಾಗಿದ್ದು ಡಿ. 15 ರವರೆಗೂ ಅವಕಾಶ ನೀಡಲಾಗಿದೆ. ಆ ನಂತರ ಡಿ. 16 ರಿಂದ ಖರೀದಿ ಕೇಂದ್ರ ಆರಂಭ ಆಗಲಿವೆ.

ನೋಂದಣಿ ಕೇಂದ್ರ ಆರಂಭ

ಖರೀದಿ ಕೇಂದ್ರ ತೆರೆದು ಬೆಂಬಲ ಬೆಲೆಯಲ್ಲಿ ಭತ್ತ ಖರೀದಿಸುವ ಪ್ರಕ್ರಿಯೆ ಕೂಡ ಆರಂಭವಾಗಿತ್ತು. ಖರೀದಿ ಕೇಂದ್ರದಲ್ಲಿ ಭತ್ತ ಮಾರಾಟ ಮಾಡಲು ಇಚ್ಚಿಸುವ ರೈತರ ನೋಂದಣಿ ಮಾಡಿಸಲು ಬುಧವಾರದಿಂದ ನೋಂದಣಿ ಕೇಂದ್ರ ಆರಂಭಿಸಲಾಯಿತು. ದಾವಣಗೆರೆ ಆರ್‌ಎಂಸಿ ಪೊಲೀಸ್‌ ಠಾಣೆ ಹಿಂಬದಿಯ ಆಹಾರ ಇಲಾಖೆಯ ಉಗ್ರಾಣದಲ್ಲಿ ನೋಂದಣಿ ಕೇಂದ್ರವನ್ನು ಆರಂಭಿಸಲಾಗಿದೆ. ಎಪಿಎಂಸಿ ಕಾರ್ಯದರ್ಶಿ ಆನಂದ್‌ ಚಾಲನೆ ನೀಡಿದರು. ಸಹಾಯಕ ಕಾರ್ಯದರ್ಶಿ ಜೆ. ಪ್ರಭು ಇತರರು ಇದ್ದರು.

ಖಾಲಿ, ಖಾಲಿ

ದಾವಣಗೆರೆ ನೋಂದಣಿ ಕೇಂದ್ರದಲ್ಲಿ ಮೊದಲ ದಿನ ಯಾವ ರೈತರು ಭತ್ತ ಮಾರಲು ನೋಂದಣಿ ಮಾಡಿಸಲಿಲ್ಲ. ಮಾರುಕಟ್ಟೆಯಲ್ಲಿ ಬೆಲೆ ಹೆಚ್ಚಳ ಆಗುತ್ತಿರುವುದರಿಂದ ರೈತನು ಕೂಡ ಕಾದು ನೋಡುವ ತಂತ್ರಕ್ಕೆ ಮೊರೆ ಹೋಗುತ್ತಿದ್ದಾರೆ. ಮೊದಲ ದಿನ ಕೇಂದ್ರಗಳು ಖಾಲಿ ಇದ್ದವು.

ಖರೀದಿ ಕೇಂದ್ರದಲ್ಲಿ ಮಾರಾಟ ಮಾಡಲು ನೋಂದಣಿ ಕೂಡ ಆರಂಭವಾಗಿದೆ. ಇನ್ನೊಂದೆಡೆ ನಾಲ್ಕು ದಿನದಿಂದ ಭತ್ತದ ಬೆಲೆ ಏರಿಕೆ ಆಗುತ್ತಿದೆ. ಬುಧವಾರ ಕ್ವಿಂಟಾಲ್‌ 1850 ರೂ. ಬೆಲೆಗೆ ಭತ್ತ ಬಿಕರಿ ಆಗಿದೆ. ಗರಿಷ್ಟ 2310 ರೂ. ಬೆಲೆ ದಾಖಲಾಗಿದೆ.

:

LEAVE A REPLY

Please enter your comment!
Please enter your name here