ಕಾಸರಗೋಡು: ಪೊಲೀಸ್‌, ಮೋಟಾರು ವಾಹನ ಇಲಾಖೆಗಳ ತಪಾಸಣೆಗಳು ನಿರಂತರವಾಗಿ ನಡೆಯುತ್ತಿದ್ದರೂ ಅಪ್ರಾಪ್ತ ಮಕ್ಕಳಅಪಾಯಕಾರಿ ವಾಹನ ಚಾಲನೆಗೆ ತಡೆ ಬಿದ್ದಿಲ್ಲ. ಇದರಿಂದ ಹಲವಾರು ಜೀವಗಳು ಬಲಿಯಾಗುತ್ತಿವೆ. ಕಳೆದ 11 ತಿಂಗಳೊಳಗೆ ಪರವಾನಗಿ ಇಲ್ಲದೆ ವಾಹನ ಚಲಾಯಿಸಿದ್ದಕ್ಕೆ ಕಾಸರಗೋಡು ಜಿಲ್ಲೆಯ ಪೊಲೀಸ್‌ ಠಾಣೆಗಳಲ್ಲಿ ಮಕ್ಕಳ ವಿರುದ್ಧ 404 ಪ್ರಕರಣಗಳು ದಾಖಲಾಗಿವೆ. 

ಇದರಲ್ಲಿ ಹೆಚ್ಚಿನವು ಕಾಸರಗೋಡು ಸಬ್‌ ಸ್ಟೇಷನ್‌ ವ್ಯಾಪ್ತಿಯವುಗಳಾಗಿವೆ. ಪರವಾನಗಿ ಇಲ್ಲದೆ, ಹೆಲ್ಮೆಟ್‌ ಧರಿಸದೆ, ಸೀಟ್‌ ಬೆಲ್ಟ್‌ ಹಾಕದೆ ವಾಹನ ಚಲಾಯಿಸಿದ್ದಕ್ಕೆ ಅಪ್ರಾಪ್ತ ಮಕ್ಕಳ ರಕ್ಷ ಕರು ಅಥವಾ ವಾಹನ ಮಾಲೀಕರ ವಿರುದ್ಧ ಕೇಸು ದಾಖಲಿಸಲಾಗಿದೆ. ಆದರೆ ತಪಾಸಣೆ ಸಿಬ್ಬಂದಿಯನ್ನು ಗಮನಿಸಿ ಬೇರೆ ದಾರಿಯಾಗಿ ಹೋಗುವವರ ಸಂಖ್ಯೆ ಹೆಚ್ಚುತ್ತಿದೆ. 

ಕಾಸರಗೋಡು ಜಿಲ್ಲೆಯ ಖಾಸಗಿ ಶಾಲೆಗಳ ವಿದ್ಯಾರ್ಥಿಗಳಲ್ಲಿ ಹೆಚ್ಚಿನವರು ಬೈಕ್‌, ಕಾರುಗಳಲ್ಲಿ ಶಾಲೆಗೆ ಬರುತ್ತಾರೆ. ಇವರಲ್ಲಿ ಹೆಚ್ಚಿನವರಿಗೆ ಪರವಾನಗಿ ಪಡೆಯುವ ಪ್ರಾಯವೂ ಆಗಿಲ್ಲ. ಪರವಾನಗಿ ಇಲ್ಲದವರು ವಾಹನಗಳನ್ನು ಶಾಲೆಗೆ ತರಬಾರದು ಎಂದು ನಿರ್ದೇಶನ ಇರುವುದರಿಂದ ಹಲವು ವಿದ್ಯಾರ್ಥಿಗಳು ಸಮೀಪದ ಪ್ರದೇಶಗಳಲ್ಲಿ ವಾಹನಗಳನ್ನು ಬಚ್ಚಿಡುವುದು ಸಾಮಾನ್ಯವಾಗಿದೆ. ಬೈಕ್‌ಗಳಲ್ಲಿ ಹೆಲ್ಮೆಟ್‌ ಧರಿಸದೆ ಮೂವರನ್ನು ಕುಳಿತುಕೊಳ್ಳಿಸಿ ಅಮಿತ ವೇಗದಲ್ಲಿ ಪಾದಚಾರಿಗಳಿಗೆ ಭೀತಿ ಸೃಷ್ಟಿಸಿ ಮಕ್ಕಳು ವಾಹನ ಚಲಾಯಿಸುವುದನ್ನು ಕಾಣಲು ಕಾಸರಗೋಡಿನ ಯಾವುದಾದರೂ ರಸ್ತೆ ಬದಿ ನಿಂತರೆ ಸಾಕು. ಅಪ್ರಾಪ್ತ ಬಾಲಕರು ಮಾತ್ರವಲ್ಲದೆ ಬಾಲಕಿಯರು ಕೂಡ ವಾಹನ ಚಲಾಯಿಸುವುದು ಕಂಡುಬರುತ್ತಿದೆ. 

ಸೋಮವಾರ ಟೂರಿಸ್ಟ್‌ ವಾಹನಕ್ಕೆ ಡಿಕ್ಕಿ ಹೊಡೆದು ಮೃತಪಟ್ಟ ವಿದ್ಯಾರ್ಥಿಯೊಂದಿಗೆ ಸ್ಕೂಟರ್‌ನಲ್ಲಿ ಇನ್ನಿಬ್ಬರು ಬಾಲಕರಿದ್ದರು. ಅದೃಷ್ಟವಶಾತ್‌ ಇವರು ಪಾರಾಗಿದ್ದಾರೆ. ಮಾನಸಿಕವಾಗಿ ಹಾಗೂ ದೈಹಿಕವಾಗಿ ದೃಢವಾಗಿಲ್ಲ ಮಕ್ಕಳು ವಾಹನ ಚಲಾಯಿಸಬಾರದು ಎಂದು ತಂದೆ-ತಾಯಿಯಂದಿರು ಅರಿವು ನೀಡದಿರುವುದು ಅಪಾಯಗಳಿಗೆ ಕಾರಣವಾಗುತ್ತಿದೆ ಎಂದು ಪೊಲೀಸರು ಹೇಳುತ್ತಿದ್ದಾರೆ. 

ಕಾಸರಗೋಡು ಜಿಲ್ಲೆಯಲ್ಲಿ 11 ತಿಂಗಳೊಳಗೆ ದಾಖಲಾದ ವಾಹನ ಅಪಘಾತಗಳಲ್ಲಿ ವಿದ್ಯಾರ್ಥಿಗಳ ಸಹಿತ 118 ಜೀವಗಳು ಬಲಿಯಾಗಿವೆ. ಕಾಸರಗೋಡು-ಕಾಞಂಗಾಡು ಕೆಎಸ್‌ಟಿಪಿ ಕರಾವಳಿ ಹೆದ್ದಾರಿಯಲ್ಲಿ ಅತ್ಯಧಿಕ ಸಂಖ್ಯೆಯಲ್ಲಿ ವಾಹನ ಅಪಘಾತಗಳು ನಡೆದಿವೆ. ಪರವಾನಗಿ ಇಲ್ಲದೆ ವಾಹನ ಚಲಾಯಿಸಿದ್ದು, ಅಪಾಯಕ್ಕೆಡೆಯಾದ ಪ್ರಕರಣಗಳು ಹಲವು ಇವೆ. 

ಇದಲ್ಲದೆ ದಾಖಲಾಗದ ಅಪಘಾತ ಪ್ರಕರಣಗಳು ಇದರ ಎರಡು ಪಟ್ಟಿಗಿಂತ ಹೆಚ್ಚು ಇವೆ. ದ್ವಿಚಕ್ರ ವಾಹನಗಳ ಪ್ರಯಾಣಿಕರಾದ ಯುವಕರು ಮೃತಪಟ್ಟವರಲ್ಲಿ ಹೆಚ್ಚಿನವರಾಗಿದ್ದಾರೆ. ಜಿಲ್ಲೆಯಲ್ಲಿ ವಾಹನ ಅಪಘಾತಗಳಲ್ಲಿ ತಿಂಗಳಲ್ಲಿ ಸರಾಸರಿ 10 ಮಂದಿ ಸಾಯುತ್ತಿರುವುದಾಗಿ ಅಂಕಿ ಅಂಶಗಳು ಹೇಳುತ್ತಿವೆ. 

ಒಂದೇ ದಿನ 133 ಕೇಸು: ಕಂದಾಯ-ಪೊಲೀಸ್‌-ಮೊಟಾರ್‌ ವಾಹನ ಇಲಾಖೆಯ ತಪಾಸಣೆಗಳಲ್ಲಿ ಮಂಗಳವಾರ ಒಂದೇ ದಿನದಲ್ಲಿ 133 ವಾಹನಗಳಿಂದ 57600 ರೂ. ದಂಡ ವಸೂಲು ಮಾಡಲಾಗಿದೆ. 

ಪರವಾನಗಿ ಇಲ್ಲದೆ ವಾಹನ ಚಾಲನೆ, ತ್ರಿಬ್ಬಲ್‌ ರೈಡಿಂಗ್‌, ಹೆಲ್ಮೆಟ್‌ ಧರಿಸದೆ ವಾಹನ ಚಲಾಯಿಸುವವರನ್ನು ಸೆರೆ ಹಿಡಿಯಲಾಗಿದೆ. 

ಕಾಸರಗೋಡು ಆರ್‌ಟಿಒ ಕೆ. ಅಬ್ದುಲ್‌ ಸಮದ್‌, ಎಂವಿಐ ಚಾರ್ಲಿ ಆ್ಯಂಟನಿ, ಎಎಂವಿಐಗಳಾದ ರಾಜೇಶ್‌ ಕೋರೋತ್‌, ಟಿ. ವೈಕುಂಠನ್‌, ದಿನೇಶನ್‌ ಕೋಡೋತ್‌, ಟ್ರಾಫಿಕ್‌ ಎಸ್‌ಐ ವಿ.ಎ. ಶಶಿ ಕುಮಾರ್‌, ಎಸ್‌ಐ ಕೆ. ಅಶೋಕನ್‌ ನೇತೃತ್ವ ನೀಡಿದರು. 

ಕಳನಾಡು ರೈಲ್ವೆ ಮೇಲ್ಸೇತುವೆಯಲ್ಲಿ ಉಂಟಾದ ಅಪಘಾತದ ಹಿನ್ನ್ನೆಲೆಯಲ್ಲಿ ಉದುಮ ಸರಕಾರಿ ಶಾಲೆಯಲ್ಲಿ ಬೇಕಲ ಎಸ್‌ಐ ಪಿ.ಕೆ. ವಿನೋದ್‌ ಕುಮಾರ್‌ ನೇತೃತ್ವ್ವದಲ್ಲಿ ನಡೆಸಿದ ತಪಾಸಣೆಯಲ್ಲಿ 10 ಬೈಕ್‌ಗಳನ್ನು ಕಸ್ಟಡಿಗೆ ತೆಗೆದುಕೊಳ್ಳಲಾಗಿದೆ. 

ಶಾಲೆಗಳ ವಿದ್ಯಾರ್ಥಿಗಳು ಉಪಯೋಗಿಸುವ ಬೈಕ್‌ಗಳು ಇದಾಗಿದ್ದು, ಇವರಿಗೆ ಲೈಸೆನ್ಸ್‌ ಇಲ್ಲ ಎಂದು ಪೊಲೀಸರು ತಿಳಿಸಿದ್ದಾರೆ. 

ಅಪ್ರಾಪ್ತ ಬಾಲಕರನ್ನು ವಾಹನ ಸಹಿತ ಸೆರೆ ಹಿಡಿದರೆ ಇವರನ್ನು ಬಿಟ್ಟು ಬಿಡುವಂತೆ ಪೊಲೀಸ್‌ ಠಾಣೆಗೆ ಜನಪ್ರತಿನಿಧಿಗಳು ಮತ್ತಿತರರು ಕರೆ ಮಾಡಿ ಆಗ್ರಹಿಸುತ್ತಾರೆ. ಕಾಸರಗೋಡು ನಗರದ ನಾನಾ ಭಾಗಗಳಿಂದ ಮಕ್ಕಳನ್ನು ಕಾನೂನಿನ ಉಲ್ಲಂಘನೆಗೆ ಸೆರೆ ಹಿಡಿದರೆ ಕೂಡಲೇ ಜನಪ್ರತಿನಿಧಿಗಳ ಫೋನ್‌ ಕರೆ ಬರುತ್ತಿರುವುದಾಗಿ ತಪಾಸಣೆ ತಂಡ ಹೇಳುತ್ತಿದೆ. ಬೃಹತ್‌ ಉದ್ಯಮಿಗಳ, ರಾಜಕೀಯ ಪಕ್ಷ ದ ನೇತಾರರ, ಜನಪ್ರತಿನಿಧಿಗಳ ಮಕ್ಕಳು ಇವರಲ್ಲಿ ಹೆಚ್ಚಿನವರಾಗಿದ್ದಾರೆ. ಹೆಚ್ಚಾಗಿ ರಕ್ಷ ಕರನ್ನು ಪೊಲೀಸ್‌ ಠಾಣೆಗೆ ಕರೆಸಿ ಕ್ಷ ಮೆ ಬರೆಸಿ ಮಕ್ಕಳನ್ನು ಕಳುಹಿಸಿಕೊಡಲಾಗುತ್ತದೆ. ಆದರೆ ಮೊದಲ ದಿನ ಬಿಟ್ಟುಬಿಟ್ಟ ಅದೇ ಮಕ್ಕಳನ್ನು ಮರು ದಿನ ಪೊಲೀಸರು ಸೆರೆ ಹಿಡಿದ ಉದಾಹರಣೆಗಳೂ ಇವೆ. 

ಉದುಮದಲ್ಲಿ ನಡೆದ ವಾಹನ ಅಪಘಾತದಲ್ಲಿ ವಿದ್ಯಾರ್ಥಿ ಮೃತಪಟ್ಟ ಹಿನ್ನಲೆಯಲ್ಲಿ ಪೊಲೀಸರು ತಪಾಸಣೆಗೆ ಇಳಿದಿದ್ದು, ಬುಧವಾರದಿಂದ ರಸ್ತೆಯಲ್ಲಿ ಅಪ್ರಾಪ್ತ ಚಾಲಕರ ಓಡಾಟ ಕಡಿಮೆಯಾಗಿದೆ. ಮಕ್ಕಳ ಬೈಕ್‌ ಸಂಚಾರ ತಡೆಗಟ್ಟಲು ಜಿಲ್ಲಾ ಎಸ್‌ಪಿ ಎಲ್ಲ ಪೊಲೀಸ್‌ ಠಾಣೆಗಳಿಗೆ ಕಠಿಣ ನಿರ್ದೇಶನ ನೀಡಿದ್ದಾರೆ. ಕಾಸರಗೋಡು ಪೇಟೆ, ಬೇಕಲ, ವಿದ್ಯಾನಗರ, ತೃಕ್ಕರಿಪುರ ಪೊಲೀಸ್‌ ಠಾಣೆಗಳಲ್ಲಿ ನಡೆದ ತಪಾಸಣೆಯಲ್ಲಿ ಹಲವರನ್ನು ಸೆರೆಹಿಡಿಯಲಾಗಿದೆ. 

ಬಾಡಿಗೆ ಕಾರು: ಅಪ್ರಾಪ್ತ ಮಕ್ಕಳು ರಕ್ಷ ಕರಿಗೆ ತಿಳಿಯದಂತೆ ಕಾರು ಬಾಡಿಗೆಗೆ ಪಡೆದು ಸ್ನೇಹಿತರೊಂದಿಗೆ ಸುತ್ತಾಡುತ್ತಿರುವುದಾಗಿ ಮಾಹಿತಿ ಇದೆ. ಇಂತಹ ಸುತ್ತಾಟ ಹೆಚ್ಚುತ್ತಿದ್ದು, ವಾಹನಗಳು ಅಪಘಾತಕ್ಕೊಳಗಾದರೆ ಅಥವಾ ಪೊಲೀಸರು ಸೆರೆ ಹಿಡಿದರೆ ಮಾತ್ರವೇ ರಕ್ಷ ಕರಿಗೆ ಮಾಹಿತಿ ಲಭಿಸುತ್ತದೆ. 

ನಾಲ್ಕೈದು ಮಕ್ಕಳು ಸೇರಿ ಹಣ ಸಂಗ್ರಹಿಸಿ ಮನೆಯವರಿಗೆ ತಿಳಿಯದೆ ಕಾರು ಬಾಡಿಗೆಗೆ ಪಡೆದು ಸುತ್ತಾಡುತ್ತಿದ್ದಾರೆ. ಈ ರೀತಿ ಭಾರಿ ಮೊತ್ತ ವಸೂಲಿ ಮಾಡಿ ವಿದ್ಯಾರ್ಥಿಗಳಿಗೆ ಕಾರು ಬಾಡಿಗೆಗೆ ನೀಡುವ ಹಲವಾರು ತಂಡಗಳು ಜಿಲ್ಲೆಯ ನಾನಾ ಕಡೆ ಕಾರ್ಯಾಚರಿಸುತ್ತಿವೆ. ಮಕ್ಕಳ ಇಂತಹ ಅಭ್ಯಾಸಗಳನ್ನು ರಕ್ಷ ಕರು ತಿಳಿದು ಮುಂಜಾಗ್ರತೆ ವಹಿಸಿದರೆ ಅಪಘಾತಗಳನ್ನು ತಡೆಗಟ್ಟಲು ಸಾಧ್ಯವಿದೆ. 

15 ಬೈಕ್‌ಗಳ ವಶ: ನಾನಾ ಶಾಲಾ ಪರಿಸರಗಳಿಂದ ಮಕ್ಕಳು ಉಪಯೋಗಿಸುತ್ತಿದ್ದ ಬೈಕ್‌ಗಳನ್ನು ಚಂದೇರ ಎಸ್‌ಐ ವಿಪಿನ್‌ಚಂದ್ರರ ನೇತೃತ್ವದಲ್ಲಿ ವಶಪಡಿಸಿಕೊಂಡು ಪೊಲೀಸ್‌ ಠಾಣೆಗೆ ತರಲಾಗಿದೆ. ಪಡನ್ನ, ಉದಿನೂರು, ಕಾಡಂಗೋಡು, ತೃಕ್ಕರಿಪುರ ಮೊದಲಾದ ಪ್ರದೇಶಗಳ ಶಾಲಾ ಪರಿಸರದಲ್ಲಿ ನಿಲ್ಲಿಸಿದ್ದ ಹದಿನೈದು ಬೈಕ್‌ಗಳನ್ನು ಪೊಲೀಸ್‌ ತಂಡ ಲಾರಿಗೆ ಹತ್ತಿಸಿ ಪೊಲೀಸ್‌ ಠಾಣೆಗೆ ತರಲಾಗಿದೆ. ಲೈಸೆನ್ಸ್‌ ಇಲ್ಲದೆ ವಿದ್ಯಾರ್ಥಿಗಳು ಚಲಾಯಿಸಿ ಶಾಲಾ ಪರಿಸರದಲ್ಲಿ ಪಾರ್ಕ್‌ ಮಾಡಿದ, ನಂಬರ್‌ ಪ್ಲೇಟ್‌ ಇಲ್ಲದ, ಕನ್ನಡಿ ಇಲ್ಲದ ಬೈಕ್‌ಗಳು ಇದರಲ್ಲಿ ಸೇರಿವೆ. 

*ಲೈಸೆನ್ಸ್‌ ಇಲ್ಲದೆ ವಾಹನ ಚಲಾಯಿಸಲು ನೀಡುವ ತಂದೆ-ತಾಯಿಯಂದಿರು ತಪ್ಪಿತಸ್ಥರಾಗುತ್ತಾರೆ. ಅಪಘಾತ ನಡೆದ ಬಳಿಕ ಇದರ ಕುರಿತು ಚಿಂತಿಸಿ ಫಲವಿಲ್ಲ. ಅದರ ಮೊದಲೇ ಮಕ್ಕಳಿಗೆ ಬುದ್ಧಿವಾದ ಹೇಳಬೇಕು. ಪೊಲೀಸರು ಶಾಲೆಗಳಿಗೆ ತೆರಳಿ ಲೈಸೆನ್ಸ್‌ ಇಲ್ಲದೆ ವಾಹನದೊಂದಿಗೆ ಬರುವ ವಿದ್ಯಾರ್ಥಿಗಳ ಮಾಹಿತಿ ಸಂಗ್ರಹಿಸಲಾಗುವುದು. ಕಾಸರಗೋಡು ಸಬ್‌ ಡಿವಿಶನ್‌ ವ್ಯಾಪ್ತಿಯಲ್ಲಿ ತಪಾಸಣೆ ಚುರುಕುಗೊಳಿಸಲಾಗುವುದು. 

-ಎಂ.ವಿ. ಸುಕುಮಾರನ್‌, ಕಾಸರಗೋಡು ಡಿವೈಎಸ್ಪಿ 

*ಲೈಸೆನ್ಸ್‌ ಇಲ್ಲದೆ ವಾಹನ ಚಲಾಯಿಸುವ ವಿದ್ಯಾರ್ಥಿಗಳನ್ನು ಪತ್ತೆಹಚ್ಚುವುದಕ್ಕಾಗಿ ಶಾಲಾ ಮಟ್ಟದಲ್ಲಿ ನೋಡೆಲ್‌ ಅಧಿಕಾರಿಯನ್ನು ನೇಮಿಸಲು ಶಿಕ್ಷ ಣ ಇಲಾಖೆಯ ನಿರ್ದೇಶನವಿದೆ. ತಪಾಸಣೆಯಲ್ಲಿ ಕೈತೋರಿಸಿದರೂ ವಿದ್ಯಾರ್ಥಿಗಳು ನಿಲ್ಲಿಸುವುದಿಲ್ಲ. ಹಿಂಭಾಗದ ನಂಬರ್‌ ಪ್ಲೇಟ್‌ಗಳನ್ನು ಬ್ಯಾಗ್‌, ಪುಸ್ತಕದಿಂದ ಮುಚ್ಚುತ್ತಾರೆ. ಮಕ್ಕಳಿಗೆ ವಾಹನ ನೀಡುವವರ ವಿರುದ್ಧ ಕಠಿಣ ಕ್ರಮ ಕೈಗೊಳ್ಳಲಾಗುವುದು. 

LEAVE A REPLY

Please enter your comment!
Please enter your name here