ಬೀದರ್‌ 

ಕೃಷಿ ಚಟುವಟಿಕೆಗಾಗಿ ಪರವಾನಗಿ ಪಡೆದುಕೊಂಡಿರುವ ಟ್ರ್ಯಾಕ್ಟರ್‌ಗಳ ಮಾಲೀಕರು ಹಾಡ ಹಗಲೇ ರಾಜಾರೋಷವಾಗಿ ಕೆಂಪು ಕಲ್ಲುಗಳನ್ನು ಅಪಾಯಕಾರಿಯಲ್ಲಿ ಸಾಗಿಸುತ್ತಿದ್ದು, ಟ್ರ್ಯಾಕ್ಟರ್‌ ಹಿಂಬದಿಯ (ಪಾಠಕ್‌)ಪಡಕಾ ಮುಚ್ಚದೇ ನಗರದಲ್ಲಿ ಕಲ್ಲುಗಳನ್ನು ಸಾಗಿಸುತ್ತಿದ್ದರಿಂದ ನಾಗರಿಕರಲ್ಲಿ ಭಯ ಕಾಡುತ್ತಿದೆ.

ನಗರದಲ್ಲಂತೂ ಹಿಂಬದಿ ಪಡಕಾ ತೆರೆದುಕೊಂಡೇ ಟ್ರ್ಯಾಕ್ಟರ್‌ಗಳನ್ನು ಓಡಿಸಲಾಗುತ್ತಿದ್ದು, ವಾಹನದ ಹಿಂದೆ ಓಡಾಡುವ ನಾಗರಿಕರು ಆತಂಕದಲ್ಲೇ ಸಂಚರಿಸುವಂತಾಗಿದೆ. ಟ್ರ್ಯಾಕ್ಟರ್‌ ಹಿಂದೆ ಸಾಗುವ ಬೈಕು, ಸೈಕಲ್‌, ಕಾರುಗಳಲ್ಲಿ ಪ್ರಯಾಣಿಸುವ ಹಾಗೂ ದಾರಿ ಹೋಕರ ಮೇಲೆ ಕಲ್ಲು ಬೀಳುವ ಸಾಧ್ಯತೆಯಿದೆ. ಇಷ್ಟಾದರೂ ಸಂಬಂಧಪಟ್ಟ ಸಾರಿಗೆ ಇಲಾಖೆ ಅಥವಾ ಸಂಚಾರ ಪೊಲೀಸರು ಯಾವುದೇ ಕ್ರಮ ಕೈಗೊಳ್ಳುತ್ತಿಲ್ಲ ಎಂಬುದು ಸಾರ್ವಜನಿಕರ ಆರೋಪ.

ಇದ್ಯಾವುದನ್ನೂ ಪರಿಗಣಿಸದೇ ಟ್ರ್ಯಾಕ್ಟರ್‌ನವರು ಜೋರಾಗಿ ಹಾಡುಗಳನ್ನು ಹಾಕಿಕೊಂಡು ಮತ್ತೊಬ್ಬರ ಜೀವಕ್ಕೆ ಮಾರಕವಾಗುವ ರೀತಿಯಲ್ಲಿ ಓಡಿಸುತ್ತಿದ್ದಾರೆ. ದಾರಿಯಲ್ಲಿನ ಹಂಫ್ಸ್‌, ತಗ್ಗು, ದಿನ್ನೆಗಳನ್ನೂ ಲೆಕ್ಕಕ್ಕೆ ತೆಗೆದುಕೊಳ್ಳದ ಟ್ರ್ಯಾಕ್ಟರ್‌ ಚಾಲಕರು ತಮಗಿಷ್ಟ ಬಂದಂತೆ ವರ್ತಿಸುತ್ತಿದ್ದಾರೆ. ಟ್ರ್ಯಾಕ್ಟರ್‌ನ ಹಿಂದೆ ಹಾಗೂ ಅಕ್ಕ-ಪಕ್ಕದಲ್ಲಿ ಸಂಚರಿಸುವವರನ್ನೂ ನೋಡದೆ ಚಾಲಕರು ತಮ್ಮ ಗುಂಗಿನಲ್ಲೇ ತಾವು ಸ್ಪೀಡಾಗಿ ಟ್ರ್ಯಾಕ್ಟರ್‌ ಓಡಿಸುತ್ತ ಬೇಜವಾಬ್ದಾರಿ ಮೆರೆಯುತ್ತಿದ್ದಾರೆ.

ಧಿಕಾರಿಗಳ ಕಣ್ಣಿಗೆ ಕಾಣುವುದಿಲ್ಲವೇ ? 

ಟ್ರ್ಯಾಕ್ಟರ್‌ ಹಿಂದಿನ ಬಾಡಿ ಮುಚ್ಚದೇ ಓಡಿಸುವುದು ನಗರ ಸೇರಿದಂತೆ ಜಿಲ್ಲೆಯಾದ್ಯಂತ ಸಾಮಾನ್ಯವಾಗಿದೆ. ಆದರೂ, ಅಧಿಕಾರಿಗಳಿಗೆ ಇಂತಹ ವಾಹನಗಳು ಕಣ್ಣಿಗೆ ಬೀಳುವುದಿಲ್ಲವೇ ?, ಕಣ್ಣಿಗೆ ಬಿದ್ದರೂ ಸುಮ್ಮನಿರುವುದ್ಯಾಕೆ ? ಕಲ್ಲು ಉರುಳಿ ಬಿದ್ದು ಜನರ ಜೀವಕ್ಕೆ ಹಾನಿಯಾದರೆ ಯಾರು ಹೊಣೆ ? ಎಂಬ ಪ್ರಶ್ನೆ ಜನರದ್ದು. ಮಾಧ್ಯಮದವರು ಕೇಳಿದಾಗ ಅಥವಾ ಬರೆದಾಗ ಮಾತ್ರ ಕ್ರಮ ಕೈಗೊಳ್ಳುತ್ತೇವೆ ಎನ್ನುವ ಅಧಿಕಾರಿಗಳು ಇಂತಹ ವಿಷಯದತ್ತ ಚಿತ್ತ ಹರಿಸಬೇಕಿದೆ. ಮನಸೋ ಇಚ್ಛೆ ನಗರದಲ್ಲಿ ಜನರ ಜೀವಕ್ಕೆ ಮಾರಕವಾಗುವ ರೀತಿಯಂತೆ ಓಡಿಸುವ ಟ್ರ್ಯಾಕ್ಟರ್‌ಗಳ ವೇಗಕ್ಕೆ ಹಾಗೂ ಇತರೆ ಕಾನೂನು ಬಾಹಿರ ಕೆಲಸಗಳಿಗೆ ಅಧಿಕಾರಿಗಳು ಕಡಿವಾಣ ಹಾಕಬೇಕು ಎನ್ನುತ್ತಾರೆ ನಗರದ ನಾಗರಿಕ ನಾಗಣ್ಣ ಪಾಟೀಲ್‌.

ಕೃಷಿಗೋಸ್ಕರ ಪರವಾನಗಿ ಪಡೆದುಕೊಂಡ ಟ್ರ್ಯಾಕ್ಟರ್‌ನವರು ಕಲ್ಲುಗಳನ್ನು ಒಯ್ಯುವಂತಿಲ್ಲ. ಅಲ್ಲದೆ, ವಾಹನದ ಹಿಂದಿನ ಬಾಡಿಯನ್ನು ತೆರೆದಿಟ್ಟು ಓಡಿಸುವುದು ಮತ್ತಷ್ಟು ತಪ್ಪು. ಇಂತಹ ಟ್ರ್ಯಾಕ್ಟರ್‌ಗಳ ಮೇಲೆ ದಾಳಿ ನಡೆಸಿ, ವಶಕ್ಕೆ ಪಡೆಯಲಾಗುತ್ತದೆ. ಸೂಕ್ತ ಕ್ರಮ ಕೈಗೊಳ್ಳಲಾಗುತ್ತದೆ.

:

LEAVE A REPLY

Please enter your comment!
Please enter your name here