ಹೊಸದಿಲ್ಲಿ: ಅಗಸ್ಟಾ ವೆಸ್ಟ್‌ಲ್ಯಾಂಡ್‌ ವಿವಿಐಪಿ ಚಾಪರ್‌ ಹಗರಣದ ಕೇಸ್‌ನಲ್ಲಿ ಆರೋಪಿ ಕ್ರಿಶ್ಚಿಯನ್ ಮೈಕೆಲ್‌ ಪರವಾಗಿ ವಾದ ಮಾಡಿದ್ದ ಭಾರತೀಯ ಯುವ ಕಾಂಗ್ರೆಸ್ (ಐವೈಸಿ) ಆಲ್ಜೊ ಕೆ. ಜೋಸೆಫ್‌ನನ್ನು ಕಾಂಗ್ರೆಸ್ ಪಕ್ಷದಿಂದಲೇ ಉಚ್ಛಾಟಿಸಲಾಗಿದೆ. ಭಾರತೀಯ ಯುವ ಕಾಂಗ್ರೆಸ್‌ನ ಯುವ ಇಲಾಖೆಯ ರಾಷ್ಟ್ರೀಯ ಉಸ್ತುವಾರಿಯಾಗಿ ಜೋಸೆಫ್‌ ಕಾರ್ಯ ನಿರ್ವಹಿಸುತ್ತಿದ್ದರು.

ಅಗಸ್ಟಾ ವೆಸ್ಟ್‌ಲ್ಯಾಂಡ್‌ ಹಗರಣದ ಕುಣಿಕೆ ಕಾಂಗ್ರೆಸ್‌ ಕತ್ತನ್ನು ಬಿಗಿಗೊಳಿಸಿರುವ ನಡುವೆಯೇ, ದಲ್ಲಾಳಿ ಕ್ರಿಶ್ಚಿಯನ್‌ ಮೈಕೆಲ್‌ ಪರ ವಾದ ಮಂಡಿಸಿರುವ ಕಾಂಗ್ರೆಸ್‌ ಯುವ ಘಟಕದ ಕಾನೂನು ಸಲಹಾ ವಿಭಾಗದ ಉಸ್ತುವಾರಿ ಅಲ್ಜೊ ಕೆ ಜೋಸೆಫ್‌ ಅವರನ್ನು ಪಕ್ಷವು ಉಚ್ಛಾಟಿಸಿದೆ. ವಾದ ಮಂಡಿಸುವ ಮುನ್ನ ಕಾಂಗ್ರೆಸ್‌ ವರಿಷ್ಠರ ಅಭಿಪ್ರಾಯ ಕೇಳದ ಹಿನ್ನೆಲೆಯಲ್ಲಿ ಪಕ್ಷದ ಹೈಕಮಾಂಡ್‌ ಅವರನ್ನು ಉಚ್ಛಾಟನೆ ಮಾಡಿದ್ದು, ಕಾನೂನು ಸಲಹಾ ವಿಭಾಗದ ಉಸ್ತುವಾರಿ ಸ್ಥಾನದಿಂದಲೂ ಕಿತ್ತೊಗೆದಿದೆ.

ಅಲ್ಲದೆ, ಈ ಬಗ್ಗೆ ಸ್ಪಷ್ಟನೆ ನೀಡಿದ ಭಾರತೀಯ ಯುವ ಕಾಂಗ್ರೆಸ್ ವಕ್ತಾರ, ”ಆಲ್ಜೊ ಜೋಸೆಫ್‌ ಪಕ್ಷದ ಪರವಾಗಿ ಕ್ರಿಶ್ಚಿಯನ್ ಪರವಾಗಿ ವಾದ ಮಾಡಿಲ್ಲ. ಅವರು ಪಕ್ಷದ ಸಲಹೆಯನ್ನೇ ಪಡೆಯದೆ ತನ್ನ ವೈಯಕ್ತಿಕ ಸಾಮರ್ಥ್ಯದಿಂದ ವಾದ ಮಾಡಿದ್ದಾರೆ. ಐವೈಸಿ ಇದನ್ನು ಒಪ್ಪಿಕೊಳ್ಳುವುದಿಲ್ಲ” ಎಂದು ಹೇಳಿದ್ದಾರೆ.

ಇದಕ್ಕೂ ಮುನ್ನ ಜೋಸೆಫ್‌ ಅವರು ಬುಧವಾರ ಸಿಬಿಐ ವಿಶೇಷ ನ್ಯಾಯಾಲಯದ ಮುಂದೆ ಹಾಜರಾಗಿ ಆರೋಪಿ ಕ್ರಿಶ್ಚಿಯನ್ ಮೈಕೆಲ್‌ ಪರ ವಾದ ಮಂಡಿಸಿದರು. ಇದಾಗಿ ಹೊರ ಬರುತ್ತಿದ್ದಂತೆಯೇ ಬಿಜೆಪಿ ಮುಖಂಡ ಸುರೇಶ್‌ ನಖುವಾ ಟ್ವೀಟ್‌ ಮೂಲಕ ಕುಟುಕಿದರು. ಹಗರಣದಲ್ಲಿ ಮುಖ ಉಳಿಸಿಕೊಳ್ಳಲು ಕಾಂಗ್ರೆಸ್‌ ಹೆಣಗುತ್ತಿದೆ ಎಂದು ಟೀಕಿಸಿದ್ದರು.

LEAVE A REPLY

Please enter your comment!
Please enter your name here