ಶಿರಹಟ್ಟಿ : ಸರಕಾರ ಗ್ರಾಮೀಣ ಪ್ರದೇಶಗಳಲ್ಲಿ ಬಡ ಮಕ್ಕಳಿಗೆ ವಸತಿ ನಿಲಯಗಳನ್ನು ತೆರೆದು ಅವರ ಶೈಕ್ಷ ಣಿಕ ಪ್ರಗತಿಗೆ ಅನುಕೂಲ ಕಲ್ಪಿಸುತ್ತಿದೆ. ಆದರೆ, ದೈಹಿಕ ಸಾಮರ್ಥ್ಯ ಹೆಚ್ಚಿಸುವ ಕ್ರೀಡಾ ಸೌಲಭ್ಯಗಳಿಂದ ವಂಚಿತರಾಗುತ್ತಿದ್ದಾರೆ. ಇದಕ್ಕೆ ಶಿರಹಟ್ಟಿಯ ಸಮಾಜ ಕಲ್ಯಾಣ ಇಲಾಖೆಯ ಸರಕಾರಿ ಮೆಟ್ರಿಕ್‌ ಪೂರ್ವ ಬಾಲಕರ ವಸತಿ ನಿಲಯವೇ ನಿದರ್ಶನ. ಈ ವಸತಿ ನಿಲಯದಲ್ಲಿ ಎಲ್ಲ ಸೌಲಭ್ಯಗಳಿದ್ದರೂ ಕ್ರೀಡಾ ಸಾಮಗ್ರಿಗಳಿಲ್ಲ ಏಕೆ ? ಎಂಬ ಪ್ರಶ್ನೆ ಎದುರಾಗಿದೆ. 

74 ವಿದ್ಯಾರ್ಥಿಗಳು ಪ್ರವೇಶ 

ಶಿರಹಟ್ಟಿಯ ಬಿಎಸ್‌ಎನ್‌ಎಲ್‌ ಕಚೇರಿ ಎದುರು ಇರುವಂತಹ ಮೆಟ್ರಿಕ್‌ ಪೂರ್ವ ಬಾಲಕರ ವಸತಿ ನಿಲಯದಲ್ಲಿ 74 ವಿದ್ಯಾರ್ಥಿಗಳು ಪ್ರವೇಶ ಪಡೆದುಕೊಂಡಿದ್ದು, ಗುರುವಾರ 56 ವಿದ್ಯಾರ್ಥಿಗಳ ದಾಖಲಾತಿ ಇದೆ. 18 ವಿದ್ಯಾರ್ಥಿಗಳು ಗೈರು ಇರುವುದು ಕಂಡು ಬಂದಿತು. ಇವರೆಲ್ಲರಿಗಾಗಿ 6 ಸ್ನಾನಗೃಹ ಹಾಗೂ 6 ಶೌಚಾಲಯ ಗೃಹಗಳಿವೆ. ಸ್ನಾನಕ್ಕಾಗಿ ಸೋಲಾರ ಹಾಗೂ ಬಾಯಲರ್‌ ವ್ಯವಸ್ಥೆ ಇದ್ದು, ಅಲ್ಲಲ್ಲಿ ಪೈಪುಗಳು ಒಡೆದು ಹೋಗಿದ್ದು, ನೀರು ಪೋಲಾಗುತ್ತಿದೆ. ವಿದ್ಯಾರ್ಥಿಗಳಿಗೆ ಶುದ್ಧ ಕುಡಿಯುವ ನೀರಿನ ಪ್ರತ್ಯೇಕ ವ್ಯವಸ್ಥೆ ಇದೆ. ಮಲಗುವುದಕ್ಕಾಗಿ ಕಾಟ್‌ ಹಾಗೂ ಬೆಡ್‌ ವ್ಯವಸ್ಥೆ ಇದೆ. 

ನಿಲಯದ 6 ಕಡೆ ಸಿಸಿ ಕ್ಯಾಮೆರಾ ಅಳವಡಿಸಿದ್ದು, ಮೇಲ್ವಿಚಾರಕರಿಗೆ ತಮ್ಮ ಕೊಠಡಿಯಲ್ಲಿ ವೀಕ್ಷಿಸುವ ವ್ಯವಸ್ಥೆ ಇದೆ. ನಿತ್ಯವೂ ವಿದ್ಯಾರ್ಥಿಗಳ ಹಾಜರಾತಿಯನ್ನು ಬಯೋಮೆಟ್ರಿಕ್‌ ಮೂಲಕ ಪಡೆದುಕೊಳ್ಳಲಾಗುತ್ತಿದೆ. ವಿದ್ಯುತ್‌ ಕಡಿತಗೊಂಡಂತಹ ಸಂದರ್ಭದಲ್ಲಿ ಯುಪಿಎಸ್‌ ವ್ಯವಸ್ಥೆಯನ್ನು ಸಹ ವಸತಿ ನಿಲಯ ಹೊಂದಿದೆ. 

ಶೂ ಇಲ್ಲ, ಲೈಬ್ರರಿ ಅಷ್ಟಕಷ್ಟೇ 

ಶೈಕ್ಷ ಣಿಕ ವರ್ಷ ಮುಗಿಯುವುದಕ್ಕೆ ಇನ್ನು ಕೆಲ ತಿಂಗಳುಗಳು ಬಾಕಿ ಉಳಿದಿದ್ದರೂ ಸಹ ಇಲಾಖೆ ವತಿಯಿಂದ ವಿದ್ಯಾರ್ಥಿಗಳಿಗೆ ಇಲ್ಲಿಯವರೆಗೂ ಶೂ-ಸಾಕ್ಸ್‌ ವಿತರಣೆ ಆಗಿಲ್ಲ. ಇತ್ತೀಚೆಗಷ್ಟೇ ಸಮವಸ್ತ್ರ ವಿತರಿಸಲಾಗಿದೆ. ಲೈಬ್ರರಿಯಲ್ಲಿ ಸಹ ಅಷ್ಟಕ್ಕಷ್ಟೇ ಪುಸ್ತಕಗಳು ಲಭ್ಯವಿವೆ. ವಿದ್ಯಾರ್ಥಿಗಳ ಜ್ಞಾನಾರ್ಜನೆಗೆ ಹೆಚ್ಚಿನ ಸಂಖ್ಯೆಯಲ್ಲಿ ಪುಸ್ತಕಗಳನ್ನು ಇಡುವುದು ಅವಶ್ಯವಿದೆ. 

ಕ್ರೀಡಾ ಅನುದಾನ ಏನಾಯಿತು? 

ವಸತಿ ನಿಲಯದ ವಿದ್ಯಾರ್ಥಿಗಳಿಗೆ ಸರಕಾರ ಕ್ರೀಡಾ ಸಾಮಗ್ರಿ ಖರೀದಿಗೆ ಅಂತಾನೆ 20 ಸಾವಿರ ರೂ.ಗಳನ್ನು ಪ್ರತ್ಯೇಕವಾಗಿ ನೀಡುತ್ತಿದೆ. ಆದರೆ ನಿಲಯಗಳಲ್ಲಿ ಕ್ರೀಡಾ ಸಾಮಗ್ರಿ ಇಲ್ಲದೇ ಇರುವುದು ಈ ಅನುದಾನ ಎಲ್ಲಿ ಹೋಯಿತು ? ಎಂಬ ಪ್ರಶ್ನೆಗೆ ಅಧಿಕಾರಿಗಳೇ ಉತ್ತರಿಸಬೇಕು. 

LEAVE A REPLY

Please enter your comment!
Please enter your name here