ಗದಗ : ಲಿಂಗಾಯತ ಸ್ವತಂತ್ರ ಧರ್ಮ ಮಾನ್ಯತೆಗೆ ಹೋರಾಟ ನಿಲ್ಲುವುದಿಲ್ಲ. ಈ ಹೋರಾಟಕ್ಕೆ ಅನೇಕ ರಾಜಕೀಯ ಮುಖಂಡರು ಬೆಂಬಲವಾಗಿ ನಿಂತಿದ್ದಾರೆ. ಆದರೆ ಚುನಾವಣೆ ಇರುವ ಕಾರಣಕ್ಕೆ ಹೋರಾಟದಲ್ಲಿ ಸಕ್ರಿಯರಾಗಿ ಭಾಗವಹಿಸದಿದ್ದರೂ ಹೋರಾಟಕ್ಕೆ ಬೆಂಬಲ ಸೂಚಿಸಿದ್ದಾರೆ ಎಂದು ಜ.ಡಾ. ತೋಂಟದ ಸಿದ್ಧರಾಮ ಶ್ರೀಗಳು ಹೇಳಿದರು.

ಸೋಮವಾರ ಜಾಗತಿಕ ಲಿಂಗಾಯತ ಮಹಾಸಭಾ ಹಾಗೂ ರಾಷ್ಟ್ರೀಯ ಬಸವ ಸೇನೆ ಗದಗ ಜಿಲ್ಲಾ ಘಟಕದ ಆಶ್ರಯದಲ್ಲಿ ಇಲ್ಲಿನ ತೋಂಟದಾರ್ಯ ಕಲ್ಯಾಣ ಕೇಂದ್ರದಲ್ಲಿ ಆಯೋಜಿಸಿದ್ದ ಲಿಂಗಾಯತ ಧರ್ಮ -ಚಿಂತನಾ ಗೋಷ್ಠಿ ಉದ್ಘಾಟಿಸಿ ಮಾತನಾಡಿದ ಅವರು, ಲಿಂಗಾಯತ ಧರ್ಮಕ್ಕೆ ಸ್ವತಂತ್ರ ಧರ್ಮದ ಮಾನ್ಯತೆ ಹಾದಿ ಅತ್ಯಂತ ದುರ್ಗಮವಾಗಿದೆ. ಹೀಗಾಗಿ ಮೊದಲಿಗೆ ಲಿಂಗಾಯತರು ಜಾಗೃತರಾಗಿ ವೈದಿಕ ಆಚರಣೆ ಬಿಟ್ಟು ಲಿಂಗಾಯತ ಧರ್ಮ ಪಾಲನೆ ಜತೆಗೆ ಹೋರಾಟದಲ್ಲಿ ಭಾಗಿಯಾಗಬೇಕು ಎಂದರು.

ವೈದಿಕಶಾಹಿ ಪರಂಪರೆಯಲ್ಲಿ ನಂಬಿಕೆ ಹೊಂದಿರುವ ಅಖಿಲ ಭಾರತ ವೀರಶೈವ ಮಹಾಸಭಾ, ಬಸವಣ್ಣನಿಂದ ಸ್ಥಾಪಿತವಾದ ಸಮಾನತೆಯ ಧರ್ಮ ಲಿಂಗಾಯತ ಪದ ಬಳಕೆಗೂ ಹಿಂದೇಟು ಹಾಕುತ್ತಿದೆ ಎಂದು ಆರೋಪಿಸಿದ ಶ್ರೀಗಳು, ಲಿಂಗಾಯತ ಸ್ವತಂತ್ರ ಧರ್ಮದ ಮಾನ್ಯತೆಗಾಗಿ ಜಾಗತಿಕ ಲಿಂಗಾಯತ ಮಹಾಸಭಾ ನಿರಂತರವಾಗಿ ಹೋರಾಟ ನಡೆಸಲಿದೆ ಎಂದರು.

ಲಿಂಗಾಯತ ಧರ್ಮ ಮತ್ತು ಶ್ರೀಮಠಗಳು (ಹಿಂದೆ, ಇಂದು, ಮುಂದೆ) ವಿಷಯವಾಗಿ ಮಾತನಾಡಿದ ಬಸವಬೆಳವಿ ಚರಂತೇಶ್ವರ ವಿರಕ್ತಮಠದ ಶರಣಬಸವ ದೇವರು, ಬಸವಣ್ಣ ಲಿಂಗಾಯತ ಧರ್ಮ ಸ್ಥಾಪನೆ ಮಾಡಿದ ನಂತರ ಶೈವ ಪರಂಪರೆಯ ಮಠಗಳು ಒಲ್ಲದ ಮನಸ್ಸಿನಿಂದ ಲಿಂಗಾಯತ ಧರ್ಮ ಪ್ರಸಾರದಲ್ಲಿ ನಿರತವಾದವು. ಕಲ್ಯಾಣ ಕ್ರಾಂತಿಯ ನಂತರ ಶರಣರು ದಶದಿಕ್ಕುಗಳ ಕಡೆಗೆ ಹೊರಟು ಹೋದಾಗ ಒಲ್ಲದ ಮನಸ್ಸಿನಿಂದ ಲಿಂಗಾಯತ ಧರ್ಮವನ್ನು ಒಪ್ಪಿಕೊಂಡಿದ್ದ ಶೈವ ಮಠಗಳು ಮತ್ತೆ ವೈದಿಕೆ ಪರಂಪರೆಗೆ ಅಂಟಿಕೊಂಡು, ಲಿಂಗಾಯತ ಧರ್ಮವನ್ನು ಹತ್ತಿಕ್ಕುವ ಪ್ರಯತ್ನ ಮಾಡಿದವು ಎಂದು ಆರೋಪಿಸಿದರು.

ಲಿಂಗಾಯತ ಧರ್ಮದ ಇತಿಹಾಸ ಮತ್ತು ಹೋರಾಟ ಕುರಿತು ಮಾತನಾಡಿದ ಜಾಗತಿಕ ಲಿಂಗಾಯತ ಮಹಾಸಭಾ ಪ್ರಧಾನ ಕಾರ್ಯದರ್ಶಿ ಡಾ. ಶಿವಾನಂದ ಜಾಮದಾರ ಮಾತನಾಡಿ, ಕಲ್ಯಾಣ ಕ್ರಾಂತಿಯ ನಂತರ ಬಸವಣ್ಣನ ಜೀವನ ಕುರಿತು ಪುರಾಣಗಳು ಹುಟ್ಟಿಕೊಂಡವು. ಅದರಲ್ಲಿ ಬಸವಣ್ಣ ನಂದಿಯ ಅವತಾರ, ಪವಾಡ ಪುರುಷ, ದೇವರು ಎನ್ನುವಂಥ ಅನೇಕ ಕಟ್ಟುಕತೆಗಳು ಸೃಷ್ಟಿಸಿ ಜನರ ದಿಕ್ಕು ತಪ್ಪಿಸುವ ಕೆಲಸ ಮಾಡಲಾಯಿತು ಎಂದರು.

ಬಸವಣ್ಣನ ಕಾಲಾನಂತರ ವಿಜಯನಗರ ಅರಸರ ಕಾಲದಲ್ಲಿ ವಚನಗಳು ಪ್ರವರ್ಧಮಾನಕ್ಕೆ ಬಂದವು. ಪ್ರಮುಖ ವಚನಗಳನ್ನು ಒಟ್ಟು ಸೇರಿಸಿ ಶೂನ್ಯ ಸಂಪಾದನೆ ಮಾಡಲಾಯಿತು. ಅದರಲ್ಲಿ 210 ವಚನಗಳನ್ನು ತಿರುಚಿ, ವೀರಶೈವ ಶಬ್ಧ ಸೇರಿಸಲಾಯಿತು. ವಚನಗಳ ಜತೆಗೆ ಶ್ಲೋಕಗಳನ್ನು ಸೇರಿಸುವ ಕೆಲಸ ನಡೆಯಿತು ಎಂದು ಆಪಾದಿಸಿದರು.

ಮುಂಡರಗಿ ತೋಂಟದಾರ್ಯ ಮಠದ ನಿಜಗುಣಾನಂದ ಸ್ವಾಮೀಜಿ, ಜಾಗತಿಕ ಲಿಂಗಾಯತ ಮಹಾಸಭಾ ರಾಷ್ಟ್ರೀಯ ಪ್ರಧಾನ ಕಾರ್ಯದರ್ಶಿ ಜೆ.ಬಿ. ಪಾಟೀಲ, ಮಾಜಿ ಸಚಿವ ಎಸ್‌.ಎಸ್‌. ಪಾಟೀಲ, ಮಾಜಿ ಶಾಸಕ ಶ್ರೀಶೈಲಪ್ಪ ಬಿದರೂರ, ಲಿಂಗಾಯತ ಪ್ರಗತಿಶೀಲ ಸಂಘದ ಅಧ್ಯಕ್ಷ ಶೇಖಣ್ಣ ಕವಳಿಕಾಯಿ ಇತರರು ಉಪಸ್ಥಿತರಿದ್ದರು.

ಲಿಂಗಯತದ ಮೊದಲ ಮಠ ಗುಡ್ಡದ ವಿರಕ್ತಮಠ : 

12ನೇ ಶತಮಾನದಲ್ಲಿ ಬಸವಣ್ಣನಿಂದ ಸ್ಥಾಪಿತವಾದ ಲಿಂಗಾಯತ ಧರ್ಮದಲ್ಲಿ 13 ಮತ್ತು 14ನೇ ಶತಮಾನದ ವರೆಗೆ ಮಠಗಳ ಕಲ್ಪನೆ ಇದ್ದಿಲ್ಲ. ಕಲ್ಯಾಣ ಕ್ರಾಂತಿಯ ನಂತರ ಚದುರಿದ ಶರಣರು ಧರ್ಮ ಪ್ರಸಾರ ಮಾಡುತ್ತ ಸಾಗಿದರು. ಹೀಗೆ ಧರ್ಮ ಪ್ರಸಾರ ಕಾರ್ಯದಲ್ಲಿ ತೊಡಗಿದ್ದ ತೋಂಟದ ಸಿದ್ಧಲಿಂಗ ಶ್ರೀಗಳು 200 ಜನ ವಿರಕ್ತರನ್ನು ಕಟ್ಟಿಕೊಂಡು ನಾಡಿನುದ್ದಕ್ಕೂ ಧರ್ಮ ಪ್ರಸಾರ ನಡೆಸಿದರು. ಅವರಲ್ಲಿ ಕೆಲವರು ಅಲ್ಲಲ್ಲಿ ನೆಲೆನಿಂತು ಮಠಗಳ ಸ್ಥಾಪನೆಗೆ ಕಾರಣರಾದರು. 17ನೇ ಶತಮಾನದಲ್ಲಿ ಹರಪನಹಳ್ಳಿಯಲ್ಲಿ ಸ್ಥಾಪನೆಯಾದ ಗುಡ್ಡದ ವಿರಕ್ತಮಠ ಲಿಂಗಾಯತ ಧರ್ಮದ ಮೊಟ್ಟಮೊದಲ ಮಠವಾಗಿದೆ. ಅಲ್ಲದೇ ಆಗಿನ ಸಂದರ್ಭದಲ್ಲಿ ಕರ್ನಾಟಕದಲ್ಲಿ 6300 ಲಿಂಗಾಯತ ಮಠಗಳಿದ್ದವು ಎಂದು ಜ.ಡಾ. ತೋಂಟದ ಸಿದ್ಧರಾಮ ಶ್ರೀಗಳು ಹೇಳಿದರು.

ನಮ್ಮ ದಾರಿ ನಮಗೆ : 

ರಂಭಾಪುರಿ ಪೀಠದ ಹಿಂದಿನ ಶ್ರೀಗಳಲ್ಲಿ ಒಬ್ಬರು, ವೀರಶೈವ ಧರ್ಮದಲ್ಲಿ ವಚನಗಳು ಎನ್ನುವ ಕಳೆ ಬೆಳೆದಿದೆ. ವೀರಶೈವ ಧರ್ಮದಿಂದ ವಚನಗಳನ್ನು ಕಿತ್ತು ಹಾಕಬೇಕು ಎಂದು ಲಿಂಗಾಯತ ಧರ್ಮಕ್ಕೆ ಅವಮಾನ ಮಾಡಿದವರು. ಈಗ ನಾವೆಲ್ಲ ಒಂದು ಎನ್ನುತ್ತಿದ್ದಾರೆ. ಈ ಹಿಂದೆ 140 ಹೆಚ್ಚು ಗ್ರಂಥ ಪ್ರಕಟಿಸಿ ಲಿಂಗಾಯತ ಮತ್ತು ಬಸವಣ್ಣನನ್ನು ಟೀಕಿಸಿದವರು ಈಗ ವೀರಶೈವ- ಲಿಂಗಾಯತ ಎರಡು ಒಂದೇ ಎನ್ನುತ್ತಿದ್ದಾರೆ ಎಂದ ಅವರು, ಪಂಚಪೀಠಾಧೀಶ್ವರರು ಬಸವಣ್ಣನನ್ನು ಒಪ್ಪುವುದಾದರೆ ಈಗಲೂ ಅವರನ್ನು ಸ್ವಾಗತಿಸಿ ಗೌರವಿಸಲು ಸಿದ್ಧ. ಇಲ್ಲದಿದ್ದರೆ ಅವರ ದಾರಿ ಅವರಿಗೆ, ನಮ್ಮ ದಾರಿ ನಮಗೆ ಎಂದು ಜಾಗತಿಕ ಲಿಂಗಾಯತ ಮಹಾಸಭಾ ಮಹಾಪ್ರಧಾನ ಕಾರ್ಯದರ್ಶಿ ಡಾ. ಶಿವಾನಂದ ಜಾಮದಾರ ಹೇಳಿದರು.

Summary
ಗದಗ : ಲಿಂಗಾಯತ ಹೋರಾಟ ನಿಲ್ಲದು !
Article Name
ಗದಗ : ಲಿಂಗಾಯತ ಹೋರಾಟ ನಿಲ್ಲದು !
Description
ಇಲ್ಲದಿದ್ದರೆ ಅವರ ದಾರಿ ಅವರಿಗೆ, ನಮ್ಮ ದಾರಿ ನಮಗೆ ಎಂದು ಜಾಗತಿಕ ಲಿಂಗಾಯತ ಮಹಾಸಭಾ ಮಹಾಪ್ರಧಾನ ಕಾರ್ಯದರ್ಶಿ ಡಾ. ಶಿವಾನಂದ ಜಾಮದಾರ ಹೇಳಿದರು. 

LEAVE A REPLY

Please enter your comment!
Please enter your name here