ಬೆಂಗಳೂರು
ಸಿಲಿಕಾನ್‌ ಸಿಟಿಯ ರಸ್ತೆಗಳಲ್ಲಿ ನಿತ್ಯ ಕಂಟಕವಾಗಿರುವ ವಾಹನ ದಟ್ಟಣೆಯನ್ನು ಇನ್ನಷ್ಟು ವೈಜ್ಞಾನಿಕವಾಗಿ ನಿರ್ವಹಿಸಲು ಬಿಇಎಲ್‌ ಸಂಸ್ಥೆ ಸಿದ್ಧಪಡಿಸಿರುವ ಕೃತಕ ಬುದ್ಧಿಮತ್ತೆ ಆಧಾರಿತ ಅಡಾಪ್ಟಿವ್‌ ಸಿಗ್ನಲ್‌ಗಳು ಸರಕಾರದ ಅನುದಾನಕ್ಕಾಗಿ ಕಾಯುತ್ತಿವೆ. ಮೊದಲ ಹಂತದಲ್ಲಿ ಬಿಡುಗಡೆಯಾಗಿದ್ದ 86 ಕೋಟಿ ಅನುದಾನದಲ್ಲಿ ಅತ್ಯಾಧುನಿಕ ಸಿಗ್ನಲ್‌ ವ್ಯವಸ್ಥೆ ರೂಪಿಸಿದ್ದು ಪ್ರಾಯೋಗಿಕ ಅಳವಡಿಕೆ ತೃಪ್ತಿಕರ ಫಲಿತಾಂಶ ನೀಡಿವೆ. ಹೀಗಾಗಿ ನಗರದ ಎಲ್ಲಾ ಸಿಗ್ನಲ್‌ಗಳಲ್ಲೂ ಈ ವ್ಯವಸ್ಥೆಯನ್ನು ಅಳವಡಿಸುವ ಕಾರ್ಯಕ್ಕೆ ತಯಾರಿಗಳು ಮುಗಿದಿದ್ದು ಸರಕಾರದ ಅನುದಾನಕ್ಕಾಗಿ ಕಾಯಲಾಗುತ್ತಿದೆ.

ಸದ್ಯ ದಿಲ್ಲಿ ಮತ್ತು ಮುಂಬೈ ಬಿಟ್ಟರೆ ಬೆಂಗಳೂರೇ ಉತ್ತಮ ಸಿಗ್ನಲ್‌ ಮತ್ತು ಸಂಚಾರ ವ್ಯವಸ್ಥೆ ಹೊಂದಿರುವ ದೊಡ್ಡ ನಗರ ಎನ್ನುವ ಖ್ಯಾತಿ ಇದೆ. ಆದರೆ, ಅಡಾಪ್ಟೀವ್‌ ಸಿಗ್ನಲ್‌ಗಳ ಅಳವಡಿಕೆ ಮೂಲಕ ಕರ್ನಾಟಕವೇ ದೇಶದಲ್ಲಿ ನಂಬರ್‌ ಒನ್‌ ಆಗುವ ತವಕದಲ್ಲಿದೆ.

ಇದುವರೆಗೂ ದೇಶದ ಯಾವ ದೊಡ್ಡ ನಗರಗಳೂ ಸಂಪೂರ್ಣವಾಗಿ ಅಡಾಪ್ಟಿವ್‌ ಸಿಗ್ನಲ್‌ ವ್ಯವಸ್ಥೆಯನ್ನು ಅಳವಡಿಸಿಕೊಳ್ಳುವ ಮಟ್ಟಕ್ಕೆ ಸಿದ್ಧತೆ ನಡೆಸಿಲ್ಲ. ದಿಲ್ಲಿ ಮತ್ತು ಮುಂಬೈನಲ್ಲಿ ಭಾಗಶಃ ಇದ್ದು ಬೆಂಗಳೂರಿನಲ್ಲಿ ಮಾತ್ರ ಸಂಪೂರ್ಣವಾಗಿ 456 ಸಿಗ್ನಲ್‌ಗಳನ್ನು ವ್‌ ತಂತ್ರಜ್ಞಾನಕ್ಕೆ ಒಗ್ಗಿಸುವ ಸಂಬಂಧ ಟೆಂಡರ್‌ ಪಡೆದಿರುವ ಬಿಇಎಲ್‌ ಸಂಸ್ಥೆ ಎಲ್ಲಾ ತಯಾರಿಗಳನ್ನು ಮುಗಿಸಿದೆ. ಸರಕಾರದಿಂದ ಬಾಕಿ ಅನುದಾನ ಬಿಡುಗಡೆಯಾಗುತ್ತಿದ್ದಂತೆ ಎಲ್ಲಾ ಸಿಗ್ನಲ್‌ಗಳಲ್ಲೂ ಅಳವಡಿಕೆ ಕಾರ್ಯ ಆರಂಭವಾಗಲಿದೆ.

ತೃಪ್ತಿ ತಂದ ಪ್ರಯೋಗ
ಇದುವರೆಗೂ ನಗರದಲ್ಲಿ ಸುಮಾರು 30 ಜಂಕ್ಷನ್‌ಗಳಲ್ಲಿ ಅಡಾಪ್ಟಿವ್‌ ಸಿಗ್ನಲ್‌ ವ್ಯವಸ್ಥೆ ಅಳವಡಿಸಲಾಗಿದೆ. ಪ್ರಾಯೋಗಿಕವಾಗಿ ಅಳವಡಿಸಲಾದ ಈ ಜಂಕ್ಷನ್‌ಗಳಲ್ಲಿನ ಒತ್ತಡ ಶೇ 40 ರಿಂದ ಶೇ 65 ಮಟ್ಟಿಗೆ ಕಡಿಮೆ ಆಗಿರುವುದನ್ನು ಗುರುತಿಸಿದ್ದಾರೆ. ಪ್ರಾಯೋಗಿಕ ಅಳವಡಿಕೆ ಎಲ್ಲರಿಗೂ ತೃಪ್ತಿ ತಂದಿರುವುದರಿಂದ ಬಿಇಎಲ್‌ ಬಗ್ಗೆ ಇಡೀ ಇಲಾಖೆಯಲ್ಲಿ ಮೆಚ್ಚುಗೆ ವ್ಯಕ್ತವಾಗಿದೆ. ಅಡಾಪ್ಟಿವ್‌ ಸಿಗ್ನಲ್‌ಗಳ ಅಳವಡಿಕೆ ನಂತರ ಬಿಇಎಲ್‌ ಸಂಸ್ಥೆಯೇ ಸಂಪೂರ್ಣವಾಗಿ ನಿಗಾ ವಹಿಸುವ ಜತೆಗೆ ನಿರ್ವಹಣೆ ಕೂಡ ಮಾಡಲಿದೆ” ಎನ್ನುತ್ತಾರೆ ಸಂಚಾರ ವಿಭಾಗದ ಹೆಚ್ಚುವರಿ ಆಯುಕ್ತ ಹರಿಶೇಖರನ್‌.

ವ್ಯತ್ಯಾಸ ಏನು ?
ಸದ್ಯ ಬೆಂಗಳೂರಿನಲ್ಲಿ ಸ್ವಯಂ ಚಾಲಿತ ಸಮಯ ನಿಗದಿ ಮಾಡಿರುವ ಸಿಗ್ನಲ್‌ ವ್ಯವಸ್ಥೆ ಇದೆ. ಅಂದರೆ ಒತ್ತಡ ಇರುವ ಸಮಯ ಮತ್ತು ಉಳಿದ ಸಮಯಗಳಲ್ಲಿ ಇಂತಿಷ್ಟು ಸೆಕೆಂಡುಗಳಿಗೆ (ಉದಾ: 180, 120, 60, 30 ಸೆಕೆಂಡುಗಳಿಗೆ ಸಿಗ್ನಲ್‌ ಲೈಟ್‌ಗಳು ಬದಲಾಗುವಂತೆ ವ್ಯವಸ್ಥೆ ಮಾಡಲಾಗಿದೆ) ಸಿಗ್ನಲ್‌ ಲೈಟ್‌ಗಳು ಬಣ್ಣ ಬದಲಾಯಿಸಬೇಕು ಎಂದು ಸಮಯ ನಿಗದಿ ಮಾಡಲಾಗಿದೆ.

ಅಡಾಪ್ಟಿವ್‌ ಸಿಗ್ನಲ್‌ ವ್ಯವಸ್ಥೆಯಲ್ಲಿ ಇನ್ಫ್ರಾರೆಡ್‌ ಕಿರಣಗಳ ನೆರವಿನಿಂದ ಜಂಕ್ಷನ್‌ನ ಯಾವ ರಸ್ತೆಯಲ್ಲಿ ಅತಿಹೆಚ್ಚು ವಾಹನಗಳು ಬರುತ್ತಿವೆ ಎನ್ನುವುದನ್ನು ಮೊದಲೇ ಗ್ರಹಿಸುವ ತಂತ್ರಜ್ಞಾನ ಆ ರಸ್ತೆಗೆ ಹೆಚ್ಚು ಅವಧಿಯ ಗ್ರೀನ್‌ ಲೈಟ್‌ ಸಿಗ್ನಲ್‌ ನೀಡುತ್ತದೆ. ವಾಹನ ದಟ್ಟಣೆ ಇಲ್ಲದ ರಸ್ತೆಗಳಿಗೆ ಕಡಿಮೆ ಅವಧಿಯ ಗ್ರೀನ್‌ ಸಿಗ್ನಲ್‌ ನೀಡುತ್ತದೆ. ಇದರಿಂದ ವಾಹನ ದಟ್ಟಣೆ ಇಲ್ಲದಿದ್ದರೂ 180, 120 ಸೆಕೆಂಡುಗಳ ವರೆಗೆ ವಾಹನ ಸವಾರರು ಗ್ರೀನ್‌ ಸಿಗ್ನಲ್‌ಗಾಗಿ ಕಾಯುತ್ತಲೇ ಇರಬೇಕಾದ ಹಳೆಯ ಪದ್ದತಿ ಇರುವುದಿಲ್ಲ.

ಮಿತಿ ಏನು ?
ಅಡಾಪ್ಟಿವ್‌ ಸಿಗ್ನಲ್‌ ವ್ಯವಸ್ಥೆಗೂ ಒಂದು ಮಿತಿ ಇದೆ. ಜಂಕ್ಷನ್‌ಗೆ ಹೊಂದಿಕೊಂಡಿರುವ ರಸ್ತೆಗಳಲ್ಲಿ ವಾಹನಗಳ ಪ್ರಮಾಣ ಅಸಮತೋಲನ ಇದ್ದಾಗ ಮಾತ್ರ ಇದು ಪರಿಣಾಮಕಾರಿಯಾಗಿ ತನ್ನ ಕರ್ತವ್ಯ ನಿರ್ವಹಿಸುತ್ತದೆ. ಆದರೆ ಎಲ್ಲಾ ರಸ್ತೆಗಳಲ್ಲೂ ಒಂದೇ ಪ್ರಮಾಣದ ವಾಹನ ಹರಿವು, ದಟ್ಟಣೆ ಇದ್ದರೆ ಆಗ ಇದರ ಕೃತಕ ಬುದ್ದಿ ಮತ್ತೆ ಕೈ ಕೊಡುತ್ತದೆ. ಹೀಗಾಗಿ ಅಸಮತೋಲನ ಇದ್ದಲ್ಲಿ ಇದು ಉಪಕಾರಿ ಎನ್ನುತ್ತಾರೆ ತಜ್ಞರು.

ಕೆಲವೊಂದು ತಾಂತ್ರಿಕ ಸಂಗತಿಗಳು ಬಾಕಿ ಇವೆ. ಅದಾದ ತಕ್ಷಣ ಕೆಲವೇ ವಾರಗಳಲ್ಲಿ ಉಳಿದ ಸಿಗ್ನಲ್‌ಗಳಲ್ಲೂ ಅಡಾಪ್ಟಿವ್‌ ಸಿಗ್ನಲ್‌ಗಳನ್ನು ಅಳವಡಿಸುವ ಪ್ರಕ್ರಿಯೆ ವೇಗ ಪಡೆದುಕೊಳ್ಳಲಿದೆ.
ಹರಿಶೇಖರನ್‌, ಹೆಚ್ಚುವರಿ ಆಯುಕ್ತರು, ಸಂಚಾರ ವಿಭಾಗ.

LEAVE A REPLY

Please enter your comment!
Please enter your name here