ಮೈಸೂರು : ಮೈಸೂರು ಮಹಾನಗರ ಪಾಲಿಕೆಯಲ್ಲಿ ಒಂದೇ ಕಾಮಗಾರಿಗೆ ಡಬಲ್‌ ಬಿಲ್‌ ಸಲ್ಲಿಸಿ ಕೋಟ್ಯಂತರ ರೂ. ಗುಳುಂ ಮಾಡಿರುವ ಪ್ರಕರಣ ಕುರಿತು ಪಾಲಿಕೆ ಕಚೇರಿಯಲ್ಲಿ ಸತ್ಯ ಶೋಧನ ಸಮಿತಿ ವಿಚಾರಣೆ ನಡೆಸುತ್ತಿದ್ದರೆ, ಇತ್ತ ಪ್ರಕರಣದ ಕೇಂದ್ರ ಬಿಂದು, ಗುತ್ತಿಗೆದಾರ ಪ್ರಕರಣ ಮುಚ್ಚಿಹಾಕಲು ರಾತ್ರೋರಾತ್ರಿ ಕಾಮಗಾರಿಗಳನ್ನು ಮಾಡಿಸುತ್ತಿದಾರೆ !

ಪಾಲಿಕೆ ವಲಯ ಕಚೇರಿ 1ರ ವ್ಯಾಪ್ತಿಯ ನ್ಯಾಯಾಲಯದ ಮುಂಭಾಗದಿಂದ ಮಹಾತ್ಮಗಾಂಧಿ (ಎಂ.ಜಿ.) ರಸ್ತೆಯ ತರಕಾರಿ ಮಾರುಕಟ್ಟೆ ಬಳಿಯ ಬ್ರಿಡ್ಜ್‌ವರೆಗಿನ ಕಾಮಗಾರಿಯಲ್ಲಿ ಡಬಲ್‌ ಬಿಲ್‌ ಸಲ್ಲಿಸಿ 1.40 ಕೋಟಿ ರೂ. ಗುಳುಂ ಮಾಡಿರುವ ಪ್ರಕರಣಕ್ಕೆ ಸಂಬಂಧಿಸಿದಂತೆ ಪಾಲಿಕೆ ಸತ್ಯಶೋಧನ ಸಮಿತಿ ಎರಡು ದಿನಗಳಿಂದ ವಿಚಾರಣೆ ನಡೆಸುತ್ತಿದೆ. ಹಾಗಾಗಿ ಕಳೆದ ಎರಡು ದಿನಗಳಿಂದ ವಲಯ 1ರ ವ್ಯಾಪ್ತಿಯ ಎಂಜಿನಿಯರ್‌ಗಳು ಕ್ಷೇತ್ರ ಕಾರ್ಯಕ್ಕೆ ತೆರಳಲು ಸಾಧ್ಯವಾಗಿಲ್ಲ. ಇದೇ ಸಮಯವನ್ನು ಬಳಸಿಕೊಂಡ ಗುತ್ತಿಗೆದಾರ, ನ್ಯಾಯಾಲಯದ ಮುಂಭಾಗದ ಎಂಜಿ ರಸ್ತೆಯ ಬಲ ಭಾಗದ ಗೀತಾ ರಸ್ತೆ, ದೇವಪಾರ್ಥಿವ ರಸ್ತೆಯಲ್ಲಿ ಬದಲಿ ಕಾಮಗಾರಿ ಕೈಗೊಂಡಿದ್ದಾರೆ.

ಬದಲಿ ಕಾಮಗಾರಿ ಏಕೆ ? 

ನ್ಯಾಯಾಲಯದ ಮುಂಭಾಗದಿಂದ ಎಂ.ಜಿ. ರಸ್ತೆಯ ತರಕಾರಿ ಮಾರುಕಟ್ಟೆ ಬಳಿಯ ಬ್ರಿಡ್ಜ್‌ವರೆಗಿನ ಕಾಮಗಾರಿಗೆ ಸಂಬಂಧಿಸದಿಂತೆ ಮೂರು ಬಿಲ್‌ ಬಿಡುಗಡೆ ಮಾಡಲಾಗಿದೆ. 1, 2ನೇ ಬಿಲ್‌ನಲ್ಲಿ ಯಾವುದೇ ಅವ್ಯವಹಾರವಾಗಿಲ್ಲ. ಆದರೆ, 3ನೇ ಬಿಲ್‌ನಲ್ಲಿ 1ಮತ್ತು 2ನೇ ಹಂತದಲ್ಲಿ ನಡೆದ ಕಾಮಗಾರಿಗಳಿಗೆ ಮತ್ತೊಮ್ಮೆ ಬಿಲ್‌ ಮಾಡಿ ಸಲ್ಲಿಸಲಾಗಿದೆ. ಹೀಗೆ ಗುತ್ತಿಗೆದಾರನು 3ನೇ ಹಂತದಲ್ಲಿ ನಡೆಯದ ಕಾಮಗಾರಿಗೆ 1.40 ಕೋಟಿ ರೂ. ಬೋಗಸ್‌ ಬಿಲ್‌ ತಯಾರಿಸಿ ಆ ಹಣ ಗುಳುಂ ಮಾಡಿದ್ದಾರೆ ಎಂಬ ಆರೋಪದ ಕುರಿತು ವಿಚಾರಣೆ ನಡೆಯುತ್ತಿದೆ. ಹಾಗಾಗಿ ಯಾವ ಕಾಮಗಾರಿಗಳನ್ನು ತೋರಿಸುವುದು ಎಂಬ ಚಿಂತೆಗೆ ಬಿದ್ದ ಗುತ್ತಿಗೆದಾರ ರಾತ್ರೋ ರಾತ್ರಿ ಬದಲಿ ಕಾಮಗಾರಿಗಳನ್ನು ಕೈಗೊಂಡಿದ್ದಾರೆ. ಪರಿಶೀಲನೆ ವೇಳೆ ಕಾಮಗಾರಿ ತೋರಿಸಿ ಪ್ರಕರಣ ಮುಚ್ಚಿಹಾಕುವ ಉದ್ದೇಶ ಇದಾಗಿದೆ ಎಂಬ ಆರೋಪ ಕೇಳಿ ಬಂದಿವೆ.

ಸಲಕರಣೆ ಜಪ್ತಿ: ”ಗುತ್ತಿಗೆದಾರ ಹೆಚ್ಚುವರಿ ಬಿಲ್‌ಗೆ ಸರಿದೂಗಿಸುವಂತೆ ಹೆಚ್ಚುವರಿ ಕಾಮಗಾರಿಗಳನ್ನು ಕೈಗೊಳ್ಳುತ್ತಿದ್ದಾರೆ. ಈ ಬಗ್ಗೆ ಮಾಹಿತಿ ಪಡೆದು ಬುಧವಾರ ಬೆಳಗ್ಗೆ ಸ್ಥಳಕ್ಕೆ ತೆರಳಿ ಪರಿಶೀಲನೆ ಮಾಡಿದಾಗ, ಅಲ್ಲಿ ಕಾಮಗಾರಿ ನಡೆಸಲಾಗುತ್ತಿತ್ತು. ಆಗ ನಾವು ಈ ಕಾಮಗಾರಿ ಕುರಿತು ಸತ್ಯ ಶೋಧನ ಸಮಿತಿ ಸಭೆ ನಡೆಯುತ್ತಿದೆ. ಹಾಗಾಗಿ ಇಲ್ಲಿ ಯಾವುದೇ ಕಾಮಗಾರಿ ಕೈಗೊಳ್ಳುವಂತಿಲ್ಲ ಎಂದು ತಿಳಿಸಿ ಕಾರ್ಮಿಕರಿಂದ ಕಾಮಗಾರಿಗೆ ಸಂಬಂಧಿಸಿದ ಸಲಕರಣೆಗಳನ್ನು ಜಪ್ತಿ ಮಾಡಿ ಕಾಮಗಾರಿ ಸ್ಥಗಿತಗೊಳಿಸಿದ್ದೇವೆ,” ಎಂದು ವಲಯ 1ರ ಅಭಿವೃದ್ಧಿ ಅಧಿಕಾರಿ ಸೋಮಶೇಖರ್‌ ವಿಜಯ ಕರ್ನಾಟಕಕ್ಕೆ ತಿಳಿಸಿದರು.

ಜಪ್ತಿ ವೇಳೆ ಕೆಲಸ ಮಾಡುತ್ತಿದ್ದ ಕಾರ್ಮಿಕರು ”ತಾವು ಗುತ್ತಿಗೆದಾರ ಕರಿಗೌಡ ಅವರ ಕಡೆಯವರು,” ಎಂದು ಒಪ್ಪಿಕೊಂಡಿದ್ದಾರೆ. ಅಂತೆಯೆ ಅಕ್ರಮವಾಗಿ ನಡೆಸುತ್ತಿದ್ದ ಕಾಮಗಾರಿ, ಕಾಮಗಾರಿಗೆ ಬಳಕೆ ಮಾಡಲು ಸಂಗ್ರಹಿಸಿಡಲಾಗಿದ್ದ ಇಂಟರ್‌ ಲಾಕ್‌ಗಳು, ಎಂ.ಸ್ಯಾಂಡ್‌ ಹಾಗೂ ಇನ್ನಿತರ ವಸ್ತುಗಳ ವೀಡಿಯೊ, ಛಾಯಚಿತ್ರ ದಾಖಲೀಕರಣ ಮಾಡಿ ಅದನ್ನು ಮೇಯರ್‌ಗೆ ಒಪ್ಪಿಸಲಾಗಿದೆ ಎಂದು ಸೋಮಶೇಖರ್‌ ತಿಳಿಸಿದ್ದಾರೆ.

ಇಲ್ಲದ ಕಾಮಗಾರಿಗಳಿಗೆ ಬಿಲ್‌ ಮಾಡಿರುವ ಗುತ್ತಿಗೆದಾರ ಇದೀಗ ಕಾಮಗಾರಿಗಳನ್ನು ಮಾಡಿಸಿ ಪ್ರಕರಣವನ್ನು ಮುಚ್ಚಿ ಹಾಕಲು ಪ್ರಯತ್ನಿಸುತ್ತಿದ್ದಾರೆ. ನ್ಯಾಯಾಲಯದ ಮುಂಭಾಗದ ಕೆಲ ರಸ್ತೆಗಳಲ್ಲಿ ಅಕ್ರಮವಾಗಿ ಕೆಲಸ ಮಾಡಿಸುತ್ತಿದ್ದು, ಸ್ಥಳಕ್ಕೆ ಭೇಟಿ ನೀಡಿ ಪರಿಶೀಲಿಸಿದ್ದೇನೆ.

-ಬಿ.ವಿ. ಮಂಜುನಾಥ್‌, ಪಾಲಿಕೆ ಸದಸ್ಯ. 

Summary
ಮೈಸೂರು : ಗುಳುಂ ಪ್ರಕರಣ ಮುಚ್ಚಿಹಾಕಲು ರಾತ್ರೋ ರಾತ್ರಿ ಕಾಮಗಾರಿ !
Article Name
ಮೈಸೂರು : ಗುಳುಂ ಪ್ರಕರಣ ಮುಚ್ಚಿಹಾಕಲು ರಾತ್ರೋ ರಾತ್ರಿ ಕಾಮಗಾರಿ !
Description
ಯಾವ ಕಾಮಗಾರಿಗಳನ್ನು ತೋರಿಸುವುದು ಎಂಬ ಚಿಂತೆಗೆ ಬಿದ್ದ ಗುತ್ತಿಗೆದಾರ ರಾತ್ರೋ ರಾತ್ರಿ ಬದಲಿ ಕಾಮಗಾರಿಗಳನ್ನು ಕೈಗೊಂಡಿದ್ದಾರೆ. ಪರಿಶೀಲನೆ ವೇಳೆ ಕಾಮಗಾರಿ ತೋರಿಸಿ ಪ್ರಕರಣ ಮುಚ್ಚಿಹಾಕುವ ಉದ್ದೇಶ ಇದಾಗಿದೆ ಎಂಬ ಆರೋಪ ಕೇಳಿ ಬಂದಿವೆ. 

LEAVE A REPLY

Please enter your comment!
Please enter your name here