ಶಿರಸಿ : ನಗರದ ರಸ್ತೆ ಬದಿಯಲ್ಲಿ ತಾತ್ಕಾಲಿಕ ಅಂಗಡಿಗಳನ್ನು ಇಟ್ಟುಕೊಂಡು ಕಾನೂನು ಬಾಹಿರವಾಗಿ ಮಾರಾಟ ಮಾಡುವ ಆಹಾರದ ಗುಣಮಟ್ಟದ ಬಗ್ಗೆ ನಿಗಾ ವಹಿಸಬೇಕು. ರಾಸಾಯನಿಕಯುಕ್ತ, ಸ್ವಚ್ಛತಾ ರಹಿತ ಹಾಗೂ ಆರೋಗ್ಯ ಅಹಿತವಾಗಿದ್ದರೆ ಸೂಕ್ತ ಕ್ರಮ ಕೈಗೊಳ್ಳಬೇಕು ಶಾಸಕ ವಿಶ್ವೇಶ್ವರ ಹೆಗಡೆ ಕಾಗೇರಿ ಅಧಿಕಾರಿಗಳಿಗೆ ಸೂಚಿಸಿದರು. 

ಇಲ್ಲಿಯ ವಿಶ್ವೇಶ್ವರಯ್ಯ ಸಭಾಂಗಣದಲ್ಲಿ ಗುರುವಾರ ಸಂಜೆ ನಡೆದ ಪ್ರಗತಿ ಪರಿಶೀಲನಾ ಸಭೆಯಲ್ಲಿ ಆಹಾರ ನಿರೀಕ್ಷ ಕ ಕಾಶಿ ಭಟ್ಟ ಅವರಿಗೆ ಶಾಸಕರು ಖಡಕ್‌ ಆಗಿ ಸೂಚಿಸಿದರು. ರಸ್ತೆಯುದ್ದಕ್ಕೂ ಆಹಾರ ಮಾರಾಟ ಜೋರಾಗುತ್ತಿದೆ. ಎಲ್ಲೆಲ್ಲಿಂದಲೋ ಬಂದು ಮಾರಾಟ ನಡೆಸಿ ಹೋಗುತ್ತಾರೆ. ಅದರ ಗುಣಮಟ್ಟದ ಬಗ್ಗೆ ಪರಿಶೀಲನೆ ನಡೆಸುವವರು ಯಾರು? ಅದನ್ನು ತಿಂದು ಸಮಾಜದ ಸ್ವಾಸ್ಥ್ಯ ಕೆಡಿಸುವುದಕ್ಕಿಂತ ಮೊದಲು ಅದರ ಬಗ್ಗೆ ನಿಗಾ ವಹಿಸಿ ಕಡಿವಾಣ ಹಾಕಬೇಕು. ಈ ಬಗ್ಗೆ ಆಹಾರ ನಿರೀಕ್ಷ ಕರು, ಪೊಲೀಸ್‌ ಇಲಾಖೆ ಹಾಗೂ ನಗರಸಭೆಯವರು ಜಂಟಿಯಾಗಿ ಕಾರ್ಯಾಚರಣೆ ಕೈಗೊಂಡು ಕ್ರಮ ಕೈಗೊಳ್ಳಬೇಕು ಎಂದರು. 

ಅಧಿವೇಶನದಲ್ಲಿ ಪ್ರಸ್ತಾಪ : ಜಿಲ್ಲೆಯಲ್ಲಿ ಅಡಕೆ ಕೊಳೆ ರೋಗದಿಂದ 16 ಸಾವಿರ ರೈತರ 6875 ಹೆಕ್ಟೇರ್‌ ಪ್ರದೇಶದ ಶೇ.33ರಷ್ಟು ಅಡಕೆ ಬೆಳೆ ಹಾನಿಯಾಗಿರುವ ಬಗ್ಗೆ ಪ್ರಸ್ತಾವನೆ ಕಳುಹಿಸಿದ್ದೇವೆ ಎಂದು ತೋಟಗಾರಿಕಾ ಅಧಿಕಾರಿ ಸತೀಶ ಹೆಗಡೆ ಮಾಹಿತಿ ನೀಡಿದರು. ಯಂತ್ರೋಪಕರಣ ಸಹಾಯಧನಕ್ಕೆ 1.5 ಕೋಟಿ ರೂ. ಅಗತ್ಯವಿದ್ದು 20 ಲಕ್ಷ ರೂ. ಮಾತ್ರ ಬಂದಿದೆ ಎಂದು ಅಧಿಕಾರಿ ಗಮನ ಸೆಳೆದರು. ಈ ಎಲ್ಲ ವಿಷಯವನ್ನು ಅಧಿವೇಶನದಲ್ಲಿ ಪ್ರಸ್ತಾಪಿಸುವುದಾಗಿ ಶಾಸಕರು ತಿಳಿಸಿದರು. 

ಬೆಳೆವಿಮೆಗೆ ಸಂಬಂಧಿತ ಸಂರಕ್ಷ ಣಾ ವೆಬ್‌ಸೈಟ್‌ ಬಂದ್‌ ಆಗಿದ್ದರಿಂದ ರೈತರಿಗೆ, ಅಧಿಕಾರಿಗಳಿಗೆ ಎಷ್ಟು ಬೆಳೆವಿಮಾ ಪರಿಹಾರ ? ಎಲ್ಲೆಲ್ಲಿಗೆ ಬಂತು ? ಎಂಬುದೇ ಗೊತ್ತಾಗುವುದಿಲ್ಲ. ಈ ವೆಬ್‌ಸೈಟ್‌ ಓಪನ್‌ ಮಾಡಿ ಪಾರದರ್ಶಕವಾಗಿ ಮಾಹಿತಿ ದೊರೆಯುವಂತಾಗಬೇಕು. ಈ ಬಗ್ಗೆ ಮೇಲಧಿಕಾರಿ ಜತೆಗೆ ಮಾತನಾಡುವುದಾಗಿ ತಿಳಿಸಿದರು. 



ಮಳೆಯಿಂದ ಹಾನಿಯಾಗಿರುವುದಕ್ಕೆ : ಅಕಾಲಿಕ ಮಳೆಯಿಂದ ಕೊಯ್ಲು ಮಾಡಿದ ಗದ್ದೆ ಸೇರಿದಂತೆ ಭತ್ತದ ಗದ್ದೆಗಳು ನೀರಿನಲ್ಲಿ ಮುಳುಗಿ ಹಾಳಾಗುತ್ತಿವೆ. ಅದರ ಬಗ್ಗೆ ಶೀಘ್ರ ವಿಮಾ ಕಂಪನಿಗಳಿಗೆ ಮಾಹಿತಿ ನೀಡಿ ಪರಿಹಾರ ಕೊಡಿಸುವ ಕೆಲಸ ಮಾಡಬೇಕು ಎಂದು ಕೃಷಿ ಅಧಿಕಾರಿಗೆ ಶಾಸಕರು ಸೂಚಿಸಿದರು. ಮಳೆಗಾಲದಲ್ಲಿ ಅತಿ ಮಳೆಯಿಂದ ಭತ್ತದ ಬೆಳೆ ಹಾನಿಯಾದ 109 ರೈತರಿಗೆ ಎನ್‌ಡಿಆರ್‌ಎಫ್‌ ನಿಧಿಯಿಂದ 5.62 ಲಕ್ಷ ರೂ.ಪರಿಹಾರ ನೀಡಲಾಗಿದೆ ಎಂದು ಅಧಿಕಾರಿ ಸಭೆಗೆ ಮಾಹಿತಿ ನೀಡಿದರು. 

ನೀರು ಬಿಡಲು ಏನ್‌ ಸಮಸ್ಯೆ? : ಇನ್ನೂ ಬೇಸಿಗೆಯೇ ಆರಂಭವಾಗಿಲ್ಲ. ಹೀಗಿರುವಾಗ ನಗರದಲ್ಲಿ ಈಗಲೇ ನೀರಿನ ಪೂರೈಕೆಯ ಬಗ್ಗೆ ಜನರು ಅಸಮಾಧಾನ ವ್ಯಕ್ತಪಡಿಸುತ್ತಿದ್ದಾರೆ. ನೀರು ಬಿಡಲು ಏನ್‌ ಸಮಸ್ಯೆ ಆಗಿದೆ ಎಂದು ನಗರಸಭೆ ಪೌರಾಯುಕ್ತೆ ಅಶ್ವಿನಿ ಅವರನ್ನು ಶಾಸಕರು ಪ್ರಶ್ನಿಸಿದರು. ಮಾರಿಗದ್ದೆಯಲ್ಲಿ ಮೂರು ಪಂಪ್‌ಗಳು ಹಳೆಯದಾಗಿದ್ದು, ನೀರೆತ್ತುವ ಸಾಮರ್ಥ್ಯ‌ ಇಲ್ಲವಾಗಿದೆ ಎಂದು ಪೌರಾಯುಕ್ತರು ಅಸಹಾಯಕತೆ ವ್ಯಕ್ತಪಡಿಸಿದರು. ನಗರಸಭೆಯಲ್ಲಿ ಹುದ್ದೆಗಳು ಖಾಲಿ ಇವೆ. ಇಲ್ಲಿಂದ ಎಂಜಿನೀಯರ್‌ಗಳನ್ನು ವರ್ಗಾವಣೆ ಮಾಡಿದರೆ ತೊಂದರೆಯಾಗುತ್ತದೆ. ಬೇರೆಯವರು ಆ ಜಾಗಕ್ಕೆ ಬಂದರೆ ಮಾತ್ರ ಇವರನ್ನು ಬಿಡುಗಡೆಗೊಳಿಸಿ ಎಂದು ಸೂಚಿಸಿದರು. 

ಸರಕಾರ ಶ್ವೇತಪತ್ರ ಹೊರಡಿಸಲಿ : ಜಿಲ್ಲಾಧಿಕಾರಿ ಕಚೇರಿ ಅಧಿಕಾರಿಗಳ ದೋಷದಿಂದ ಶಾಸಕರ ನಿಧಿ ಸಹ ವಾಪಸ್‌ ಹೋಗಿದೆ. ಜಿಲ್ಲಾ ಉಸ್ತುವಾರಿ ಸಚಿವರಿಗೆ, ಜಿಲ್ಲಾಡಳಿತಕ್ಕೆ ಸಾಕಷ್ಟು ಬಾರಿ ಹೇಳಿದ್ದರೂ ಪ್ರಯೋಜನವಾಗಿಲ್ಲ. ಬಸವ ವಸತಿ ಮನೆಗಳಿಗೆ ಆರೇಳು ತಿಂಗಳುಗಳಿಂದ ಹಣ ಬಿಡುಗಡೆಯಾಗಿಲ್ಲ. ಪ್ರತ್ಯೇಕ ಹೆರಿಗೆ ಆಸ್ಪತ್ರೆ ಕಾಮಗಾರಿ ಆರಂಭಿಸಿ ಹಲವು ವರ್ಷ ಕಳೆದರೂ, ಶೇ.10ರಷ್ಟು ಕೆಲಸ ಆಗಿಲ್ಲ. ಹೊಂಡ ಮುಚ್ಚುವ ಕಾಮಗಾರಿಗೆ ಟೆಂಡರ್‌ ಆಗಿಲ್ಲ. ಸರಕಾರದ ಬಳಿ ಅಭಿವೃದ್ಧಿಗೆ, ನೌಕರರಿಗೆ ವೇತನ ನೀಡಲು ಹಣ ಇಲ್ಲವಾಗಿದೆ. ಹಣ ಎಲ್ಲೋ ಹೋಗ್ತಾ ಇದೆ ಎಂಬುದೇ ಗೊತ್ತಾಗುತ್ತಿಲ್ಲ. ಈ ಬಗ್ಗೆ ಶ್ವೇತಪತ್ರ ಹೊರಡಿಸಬೇಕು ಎಂದು ಹೇಳಿದರೂ ಅದನ್ನು ಸರಕಾರ ಮಾಡುತ್ತಿಲ್ಲ ಎಂದು ಶಾಸಕ ವಿಶ್ವೇಶ್ವರ ಹೆಗಡೆ ಕಾಗೇರಿ ಅಸಮಾಧಾನ ವ್ಯಕ್ತಪಡಿಸಿದರು. 

LEAVE A REPLY

Please enter your comment!
Please enter your name here