ಕರ್ನಾಟಕ ಗ್ರಾಮೀಣ ಮೂಲಸೌಲಭ್ಯ ಅಭಿವೃದ್ಧಿ ನಿಗಮದ ಲೆಕ್ಕದಲ್ಲಿ ಹಲವು ಕಾಮಗಾರಿಗಳು ಮುಗಿದಿವೆ. ಆದರೆ ವಾಸ್ತವದಲ್ಲಿ ಪರಿಶೀಲಿಸಿದರೆ ಕಾಮಗಾರಿ ಆರಂಭಿಸಿಯೇ ಇಲ್ಲ. ನಡೆದೇ ಇಲ್ಲದ ಕಾಮಗಾರಿಗಳನ್ನು ಪೂರ್ಣಗೊಂಡಿವೆ ಎಂದು ಸುಳ್ಳು ಲೆಕ್ಕ ತೋರಿಸಲಾಗಿದ್ದು, ಅಕ್ರಮ ನಡೆದಿರುವ ಶಂಕೆ ವ್ಯಕ್ತವಾಗಿದೆ.

ನಡೆಯದ ಕಾಮಗಾರಿ ಮುಕ್ತಾಯವಾಗಿದೆ: ತಾಲೂಕಿನ ಅಂಬಾಜಿದುರ್ಗ ಹೋಬಳಿಯ ಉಪ್ಪರಪೇಟೆ ಗ್ರಾಮ ಪಂಚಾಯಿತಿ ವ್ಯಾಪ್ತಿಯ ಬೊಮ್ಮೇಕಲ್ಲು ಗ್ರಾಮದಲ್ಲಿ ವಿಶ್ವೇಶ್ವರಯ್ಯ ಜಲನಿಗಮದ ವತಿಯಿಂದ ಎಸ್‌ಸಿ ಕಾಲೊನಿಯಲ್ಲಿ ಸಿಸಿ ರಸ್ತೆ ಅಭಿವೃದ್ಧಿ ಕಾಮಗಾರಿಗಾಗಿ 9 ಲಕ್ಷ ರೂ. ಹಣವನ್ನು ಮೀಸಲಿರಿಸಲಾಗಿದೆ. ಆದರೆ ಬೊಮ್ಮೇಕಲ್ಲು ಗ್ರಾಮದಲ್ಲಿ ಎಲ್ಲಿಯೂ ಕಾಮಗಾರಿ ನಡೆದಿಲ್ಲ. ಆದರೆ ಕೆಆರ್‌ಐಡಿಎಲ್‌ ನೀಡಿರುವ ಮಾಹಿತಿಯಂತೆ ಭೌತಿಕ ಪ್ರಗತಿ ವರದಿಯಲ್ಲಿ ಕಾಮಗಾರಿ ಮುಕ್ತಾಯವಾಗಿದೆ ಎಂದಿದೆ. ಆದರೆ ಇಡೀ ಗ್ರಾಮದ ಎಸ್‌ಸಿ ಕಾಲೊನಿಯಲ್ಲಿ ಹುಡುಕಿದರೆ ಎಲ್ಲಿಯೂ ರಸ್ತೆ ಹಾಕಿರುವ ಕುರುಹು ಕಾಣುತ್ತಿಲ್ಲ.

ತಾಲೂಕಿನಲ್ಲಿ ಒಟ್ಟು 9 ಕಾಮಗಾರಿಗಳು: ಇನ್ನು ವಿಶ್ವೇಶ್ವರಯ್ಯ ಜಲ ನಿಗಮದ ವತಿಯಿಂದ ಚಿಂತಾಮಣಿ ತಾಲೂಕಿನಾದ್ಯಂತ ಒಟ್ಟು 9 ಹಳ್ಳಿಗಳಲ್ಲಿ ಕಾಮಗಾರಿಗಳು ನಡೆದಿವೆ ಮತ್ತು ನಡೆಯುತ್ತಿವೆ ಎಂಬುದಾಗಿ ತೋರಿದ್ದಾರೆ. ಅದರಲ್ಲಿ ಎರಡನ್ನು ಪ್ರಾರಂಭಿಸಲಾಗಿದೆ, ಒಂದು ಪ್ರಗತಿಯಲ್ಲಿದೆ ಎಂದು ತೋರಲಾಗಿದೆ. ಉಳಿದಂತೆ ಬೊಮ್ಮೇಕಲ್ಲು ಗ್ರಾಮವನ್ನು ಒಳಗೊಂಡಂತೆ 6 ಕಡೆಗಳಲ್ಲಿ ಮುಕ್ತಾಯವಾಗಿದೆ ಎಂದು ತೋರಿಸಲಾಗಿದೆ.

ಲಪಟಾಯಿಸಲು ನೋಡಿದರೇ ಅಧಿಕಾರಿಗಳು?: ಬೊಮ್ಮೇಕಲ್ಲು ಗ್ರಾಮದ ಕಾಮಗಾರಿಯ ಕುರಿತು ವಿಚಾರಿಸಿದರೆ ಈ ಗ್ರಾಮವು ಗ್ರಾಮ ವಿಕಾಸ ಯೋಜನೆಗೆ ಆಯ್ಕೆಯಾಗಿದ್ದು, ಯೋಜನೆಯ ಅಡಿಯಲ್ಲಿ ಗ್ರಾಮದ ಎಸ್‌ಸಿ ಕಾಲೊನಿಯಲ್ಲಿ ಸಿಮೆಂಟ್‌ ರಸ್ತೆಗಳನ್ನು ಹಾಕಲಾಗಿದ್ದು, ರಸ್ತೆ ಹಾಕಲು ಸಾಧ್ಯವಿಲ್ಲ. ಈಗಾಗಲೇ ಹಾಕಿರುವ ರಸ್ತೆಗಳನ್ನು ತೋರಿಸಿ ಹಣ ಲಪಟಾಯಿಸಲು ಅಧಿಕಾರಿಗಳು ಯತ್ನಿಸಿದ್ದಾರೆಯೇ ಎನ್ನುವ ಅನುಮಾನ ಕಾಮಗಾರಿ ವಿವರಗಳನ್ನು ನೋಡಿದಾಗ ಮೂಡುತ್ತದೆ.

ಉಳಿದ ಗ್ರಾಮಗಳ ಕತೆ ಏನು?: ಬೊಮ್ಮೇಕಲ್ಲು ಗ್ರಾಮದ ಎಸ್‌ಸಿ ಕಾಲೊನಿಯ 9 ಲಕ್ಷ ದ ಸ್ಥಿತಿ ಹೀಗಿದ್ದರೆ ಉಳಿದ 5 ಗ್ರಾಮಗಳಲ್ಲಿ ಮುಕ್ತಾಯವಾಗಿರುವ ಕಾಮಗಾರಿಗಳ ಕತೆ ಏನು? ಮತ್ತು ಕಾಮಗಾರಿಗಳು ನಡೆಯುತ್ತಿರುವ ಗ್ರಾಮಗಳ ಸ್ಥಿತಿ ಏನು ಎಂಬುದು ಯಕ್ಷ ಪ್ರಶ್ನೆಯಾಗಿದ್ದು ಸಾರ್ವಜನಿಕರನ್ನು ಕಾಡುತ್ತಿದೆ.

ಕಾಮಗಾರಿ ನಡೆದಿಲ್ಲ ತಪ್ಪಾಗಿ ಟೈಪಾಗಿದೆ: ಈ ಕುರಿತು ಕೆಆರ್‌ಐಡಿಎಲ್‌ನ ಸಹಾಯಕ ಕಾರ್ಯಪಾಲಕ ಅಭಿಯಂತರ ವಾದೀರಾಜ್‌ ಅವರನ್ನು ಪ್ರಶ್ನಿಸಿದಾಗ, ಇಲ್ಲಿ ನಿಮಗೆ ನೀಡಿರುವ ದಾಖಲೆಯಲ್ಲಿ ಮುಕ್ತಾಯವಾಗಿದೆ ಎಂದಿದೆ. ಆದರೆ ಮುಕ್ತಾಯವಾಗಿಲ್ಲ ಇದೀಗ ಪ್ರಾರಂಭಿಸಲಾಗುತ್ತಿದೆ. ಅದು ತಪ್ಪಾಗಿ ಮುದ್ರಣವಾಗಿದೆ, ಅದನ್ನು ಸರಿಪಡಿಸಲಾಗುವುದು ಎಂದು ತಿಳಿಸಿದರು.

ಹಲವು ಅನುಮಾನಗಳಿಗೆ ಎಡೆ: ಇನ್ನು ಕೆಐಆರ್‌ಡಿಎಲ್‌ನ ವತಿಯಿಂದ ಹಮ್ಮಿಕೊಳ್ಳಲಾಗಿರುವ ವಿವಿಧ ಕಾಮಗಾರಿಗಳ ಕುರಿತು ಅನುಮಾನಗಳು ಹುಟ್ಟಿಕೊಳ್ಳುತ್ತಿದ್ದು, ಪ್ರಾರಂಭವೇ ಆಗದ ಕಾಮಗಾರಿಗೆ ಬರೋಬ್ಬರಿ 9 ಲಕ್ಷ ಗಳಷ್ಟು ಮೊತ್ತವನ್ನು ಖರ್ಚು ಮಾಡಿದ್ದೇವೆ ಎಂದು ಲೆಕ್ಕ ತೋರಿರುವ ಅಧಿಕಾರಿಗಳ ಸಾಹಸಕ್ಕೆ ಸಾಹೋ ಎನ್ನಬೇಕು. ಈ ಕುರಿತು ಸೂಕ್ತ ತನಿಖೆ ಮಾಡಬೇಕು ಎಂಬುದು ಬೊಮ್ಮೇಕಲ್ಲು ಗ್ರಾಮದ ಎಸ್‌ಸಿ ಕಾಲೊನಿ ನಿವಾಸಿಗಳು ಒತ್ತಾಯಿಸಿದ್ದಾರೆ.
52 ಲಕ್ಷ ಮೊತ್ತದ ಕಾಮಗಾರಿ 
ಚಿಂತಾಮಣಿ ತಾಲೂಕಿನಲ್ಲಿ ವಿಶ್ವೇಶ್ವರಯ್ಯ ಜಲ ನಿಗಮದ ವತಿಯಿಂದ ಜಾರಿಯಾಗಿ ಕೆಆರ್‌ಐಡಿಎಲ್‌ ನಡೆಸುತ್ತಿರುವ ಒಟ್ಟು 9 ಕಾಮಗಾರಿಗಳ ಒಟ್ಟು ಮೊತ್ತ 52 ಲಕ್ಷ . ಇದರಲ್ಲಿ ಬೊಮ್ಮೇಕಲ್ಲು ಸೇರಿದಂತೆ ಒಟ್ಟು 37 ಲಕ್ಷ ಈಗಾಗಲೇ ಖರ್ಚಾಗಿದೆ. ಉಳಿದ 15 ಲಕ್ಷ ಮೊತ್ತದ ಕಾಮಗಾರಿಗಳ ನಡೆಯಬೇಕಿದೆ.

LEAVE A REPLY

Please enter your comment!
Please enter your name here