ಶಿವಾನಂದ ಮೊಕ್ತೆದಾರ ಔರಾದ್‌ :

ಈ ವಸತಿ ನಿಲಯದಲ್ಲಿ 90 ವಿದ್ಯಾರ್ಥಿಗಳಿದ್ದಾರೆ. ಎಲ್ಲರಿಗೂ ಒಂದೇ ಸ್ನಾನಗೃಹ. ಬೆಳಗ್ಗೆ ಎದ್ದು ಸ್ನಾನಕ್ಕೆ ನಿಂತರೆ ಕೆಲವರು ಸ್ನಾನ ಮಾಡುತ್ತಾರೆ, ಇನ್ನೂ ಕೆಲವರಿಗೆ ಪಾಳಿಯೇ ಸಿಗುವುದಿಲ್ಲ. ಇದರಿಂದ ಸ್ನಾನವಿಲ್ಲದೆ ಕಾಲೇಜಿಗೆ ಹೋಗಬೇಕಾದ ಅನಿವಾರ್ಯತೆಯಿದೆ.

ಇದು ಗ್ರಾಮೀಣ ಭಾಗದ ಮಾತಲ್ಲ. ತಾಲೂಕು ಕೇಂದ್ರ ಔರಾದ್‌ ಪಟ್ಟಣದ ಮುಖ್ಯರಸ್ತೆಯಲ್ಲಿರುವ ಹಿಂದುಳಿದ ವರ್ಗಗಳ ಕಲ್ಯಾಣ ಇಲಾಖೆಯಡಿ ನಡೆಯುತ್ತಿರುವ ಮೆಟ್ರಿಕ್‌ ನಂತರದ ವಸತಿ ನಿಲಯದ ಅವ್ಯವಸ್ಥೆ. ಒಂದೇ ಸ್ನಾನದ ಕೋಣೆ ಇರುವುದರಿಂದ ಅನೇಕ ವಿದ್ಯಾರ್ಥಿನಿಯರು ನಸುಕಿನಲ್ಲಿಯೇ ಪಾಳಿಗೆ ನಿಲ್ಲಬೇಕಾಗುತ್ತದೆ. ಸ್ನಾನಕ್ಕಂತೂ ತಣ್ಣೀರೇ ಗತಿಯಾಗಿದೆ. ಸಾಲಿನಲ್ಲಿ ನಿಂತರೂ ತಮ್ಮ ಪಾಳಿ ಬರಲಿಲ್ಲ ಎಂದರೆ ಕಾಲೇಜಿಗೆ ಮುಖ ತೊಳೆದು ಹೋಗಬೇಕು. ಇದರಿಂದ ಶೇ.70 ವಿದ್ಯಾರ್ಥಿಗಳು ನಿತ್ಯ ಬೆಳಗ್ಗೆ ಸ್ನಾನ ಮಾಡುವುದನ್ನೇ ಮರೆತು ಬಿಟ್ಟಿದ್ದಾರೆ. ಸ್ನಾನ ಮತ್ತೆ ಸಂಜೆಯೇ ಮಾಡಬೇಕಾದ ಪರಿಸ್ಥಿತಿಯಿದೆ.

ನಿಯಮದ ಪ್ರಕಾರ 10 ವಿದ್ಯಾರ್ಥಿಗಳಿಗೊಂದು ಶೌಚಾಲಯ, ಸ್ನಾನದ ಕೋಣೆ ಕಡ್ಡಾಯ ಇರಬೇಕು. ಆದರೆ, ಪ್ರತಿ ತಿಂಗಳು 47.200 ರೂ. ಬಾಡಿಗೆ ನೀಡುತ್ತಿರುವ ಸರಕಾರ ಇಂಥ ಕಟ್ಟಡದಲ್ಲಿ ವಿದ್ಯಾರ್ಥಿನಿಯರ ಹಾಸ್ಟೆಲ್‌ ನಡೆಸುತ್ತಿದೆ. ವಿದ್ಯಾರ್ಥಿಗಳು ನಿತ್ಯ ಸ್ನಾನ ಮಾಡದ ಕಾರಣ ಆರೋಗ್ಯದಲ್ಲಿ ಏರುಪೇರಾಗುತ್ತಿದೆ. ಇದರ ಬಗ್ಗೆ ಅನೇಕ ಬಾರಿ ಅಧಿಕಾರಿಗಳಿಗೆ ತಿಳಿಸಿದರೂ ಪ್ರಯೋಜನವಾಗಿಲ್ಲ ಎಂದು ವಿದ್ಯಾರ್ಥಿನಿಯರು ತಿಳಿಸುತ್ತಾರೆ.

ಕಲುಷಿತ ನೀರೇ ಗತಿ : ಕಟ್ಟಡದಲ್ಲಿರುವ ನೀರಿನ ಟ್ಯಾಂಕ್‌ನಲ್ಲಿರುವ ನೀರು ನಿತ್ಯ ವಿದ್ಯಾರ್ಥಿನಿಯರು ಉಪಯೋಗಿಸುತ್ತಿದ್ದಾರೆ. ಇದರಿಂದ ಸಾಂಕ್ರಾಮಿಕ ರೋಗಗಳ ಭೀತಿ ಮಕ್ಕಳು ಎದುರಿಸುತ್ತಿದ್ದಾರೆ. ಶುದ್ಧ ನೀರು ಒದಗಿಸುವ ಫಿಲ್ಟರ್‌ ದುರಸ್ತಿ ಮಾಡುವಂತೆ ಅನೇಕ ತಿಂಗಳಿಂದ ಮನವಿ ಮಾಡಿಕೊಳ್ಳುತ್ತಿದ್ದೇವೆ. ಆದರೆ ಪ್ರಯೋಜನವಾಗಿಲ್ಲ ಎಂದು ವಿದ್ಯಾರ್ಥಿನಿಯರು ಗೋಳು ತೋಡಿಕೊಳ್ಳುತ್ತಾರೆ.

ಆಟದ ಸಾಮಗ್ರಿಗಳಿಲ್ಲ: ವಸತಿ ನಿಲಯದಲ್ಲಿ ಈ ಹಿಂದೆ ಮೇಲ್ವಿಚಾರಕಿಯಾಗಿ ಸೇವೆ ಸಲ್ಲಿಸಿರುವವರು ನಿಲಯದಲ್ಲಿರುವ ಎಲ್ಲ ಆಟದ ಸಾಮಗ್ರಿಗಳು ಕೊಂಡೊಯ್ದಿದ್ದಾರೆ. ಅವರು ನಿವೃತ್ತರಾಗಿದ್ದು, ಆಹಾರವನ್ನೂ ವಿದ್ಯಾರ್ಥಿಗಳಿಗೆ ಸರಿಯಾಗಿ ನೀಡುತ್ತಿಲ್ಲ ಎಂದು ವಿದ್ಯಾರ್ಥಿನಿಯರು ಅಸಮಾಧಾನ ವ್ಯಕ್ತಪಡಿಸಿದ್ದಾರೆ. ವಸತಿ ನಿಲಯಕ್ಕೆ ನಾಲ್ಕು ಕಂಪ್ಯೂಟರ್‌ಗಳು ಬಂದಿದೆ. ಆದರೆ, ಇಲ್ಲಿವರೆಗೆ ಜಾರಿ ಮಾಡಿಲ್ಲ. ಅಧಿಕಾರಿಗಳು ಮಹಿಳೆಯರ ವಸತಿ ಎಂಬ ಕಾರಣಕ್ಕೆ ನಿರ್ಲಕ್ಷ ್ಯ ತೋರುತ್ತಿದ್ದಾರೆ ಎಂದು ದೂರಿದರು.

ಮೊಟ್ಟೆ ಕೊಟ್ಟಿದ್ದು ಒಂದೇ ಬಾರಿ 

ಪ್ರಸ್ತಕ ಸಾಲಿನಲ್ಲಿ ವಸತಿ ನಿಲಯ ಆರಂಭವಾದಾಗಿನಿಂದ ಇಲ್ಲಿವರೆಗೆ ಮೊಟ್ಟೆ ಒಂದೇ ಬಾರಿ ಕೊಟ್ಟಿದ್ದಾರೆ. ನಿಯಮದ ಪ್ರಕಾರ ವಾರದಲ್ಲಿ ಮೂರು ದಿನ ಮೊಟ್ಟೆ ಹಾಗೂ ಬಾಳೆಹಣ್ಣು ನೀಡಬೇಕು. ಆದರೆ, ಇಲ್ಲಿವರೆಗೆ ಒಂದೇ ಬಾರಿ ಮೊಟ್ಟೆ ನೀಡಿದ್ದಾರೆ. ತಿಂಗಳ ಮೊದಲನೇ ದಿನ ಹಾಗೂ 15ನೇ ದಿನದಂದು ಮಾಂಸಾಹಾರ ನೀಡಬೇಕು. ಆದರೆ, ಇಲ್ಲಿ ನಿಯಮ ಪಾಲನೆಯಾಗುತ್ತಿಲ್ಲ ಎಂದು ವಿದ್ಯಾರ್ಥಿಗಳು ದೂರಿದ್ದಾರೆ.

ವಸತಿ ನಿಲಯಕ್ಕೆ ಭೇಟಿ ನೀಡುವ ಮೂಲಕ ವಿದ್ಯಾರ್ಥಿಗಳೊಂದಿಗೆ ಸಮಸ್ಯೆಗಳ ಬಗ್ಗೆ ಚರ್ಚಿಸಿ ಸ್ಪಂದಿಸಲಾಗುತ್ತದೆ. ಸ್ನಾನದ ಕೋಣೆಗಳನ್ನು ಹೆಚ್ಚಳ ಮಾಡುತ್ತೇವೆ. ಫಿಲ್ಟರ್‌ ನೀರು, ಆಟದ ಸಾಮಗ್ರಿಗಳು ನೀಡಲಾಗುವುದು.

:

LEAVE A REPLY

Please enter your comment!
Please enter your name here