https://m.vijaykarnataka.com/topics/%E0%B2%B9%E0%B3%82%E0%B2%B5%E0%B2%BF%E0%B2%A8%E0%B2%B9%E0%B2%A1%E0%B2%97%E0%B2%B2%E0%B2%BF/ampdefault
ಹೂವಿನಹಡಗಲಿ: Latest ಹೂವಿನಹಡಗಲಿ News & Updates, Photos …
 

ಉತ್ತರ ಕರ್ನಾಟಕವನ್ನು ಸಂಪೂರ್ಣವಾಗಿ ನಿರ್ಲಕ್ಷಿಸಿರುವ ಸಿ.ಎಂ. ಎಚ್.ಡಿ. ಕುಮಾರಸ್ವಾಮಿ ಪಾಲಿಗೆ ಹೊಳೆನರಸೀಪುರವೇ ಒಂದು ದೊಡ್ಡ ರಾಜ್ಯವಾಗಿದೆ ಎಂದು ಮಾಜಿ ಸಿಎಂ ಜಗದೀಶ ಶೆಟ್ಟರ್ ಲೇವಡಿ ಮಾಡಿದರು.

ಹೂವಿನಹಡಗಲಿ ವಿಧಾನಸಭೆ ಕ್ಷೇತ್ರ ವ್ಯಾಪ್ತಿಯ ಮೋರಗೆರೆ ಗ್ರಾಮದ ರೈತ ಹುಳಿಮಜ್ಜಿಗೆ ವೀರೇಶರ ಹೊಲಕ್ಕೆ ಬೇಟಿ ನೀಡಿ ಮೆಕ್ಕೆಜೋಳ ಬೆಳೆಯನ್ನು ವೀಕ್ಷಿಸಿದ ಬಳಿಕ ಸುದ್ದಿಗಾರರೊಂದಿಗೆ ಮಂಗಳವಾರ ಮಾತನಾಡಿದರು. ಗದಗ, ಕೊಪ್ಪಳ ಹಾಗೂ ಬಳ್ಳಾರಿ ಜಿಲ್ಲೆಯ ಎಲ್ಲ ತಾಲೂಕುಗಳು ಬರ ಪೀಡಿತ ಪ್ರದೇಶವೆಂದು ಘೋಷಿಸಲಾಗಿದೆ. ಆದರೆ ಈವರೆಗೆ ಯಾವೊಬ್ಬ ಜಿಲ್ಲಾ ಮಂತ್ರಿ, ಸ್ಥಳೀಯ ಶಾಸಕ ಇಲ್ಲವೇ ಅಧಿಕಾರಿಗಳಾಗಲಿ, ರೈತರ ಹೊಲಗಳಿಗೆ ಭೇಟಿ ನೀಡಿಲ್ಲ. ಸಮೀಕ್ಷೆಯನ್ನೂ ನಡೆಸಿಲ್ಲ. ಸಚಿವರು ಬರ ಕುರಿತು ಅಧಿಕಾರಿಗಳ ಸಭೆಯನ್ನು ಕರೆಯದಷ್ಟು ಬೇಜವಾಬ್ದಾರಿ ಪ್ರದರ್ಶಿಸಿದ್ದಾರೆ. ಬಳ್ಳಾರಿ ಜಿಲ್ಲಾ ಉಸ್ತುವಾರಿ ಮಂತ್ರಿ ನಾಪತ್ತೆಯಾಗಿದ್ದರೆ, ಗದಗ ಜಿಲ್ಲೆಗೆ ಉಸ್ತುವಾರಿ ಮಂತ್ರಿಯೇ ಇಲ್ಲ. ಇನ್ನು ಸಿಎಂ ಕುಮಾರಸ್ವಾಮಿಗೆ ಉತ್ತರ ಕರ್ನಾಟಕ ಎಂದರೆ ಪೂರ್ಣ ಅಲರ್ಜಿಯಾಗಿದೆ ಎಂದು ಆರೋಪಿಸಿದರು.

ರೈತರ ಹಿತ ಕಾಯುವಲ್ಲಿ ವಿಫಲ: ಸಾಲಮನ್ನಾ ಘೋಷಣೆಯಾಗಿ 5 ತಿಂಗಳು ಕಳೆದರೂ ರೈತರ ಖಾತೆಗೆ ನಯಾ ಪೈಸೆ ಹಣ ಪಾವತಿಯಾಗಿಲ್ಲ. ಅತ್ತ ಬಾಂಕ್ ಅಧಿಕಾರಿಗಳು ರೈತರ ಮನೆ ಬಾಗಿಲಿಗೆ ನಿತ್ಯವೂ ಎಡತಾಕುತ್ತಿದ್ದಾರೆ. ರೈತರ ಹಿತ ಕಾಯುವಲ್ಲಿ ಸರಕಾರ ಸಂಪೂರ್ಣ ವಿಫಲವಾಗಿದೆ ಎಂದರು. ಎಲ್ಲೆಡೆ ಕುಡಿವ ನೀರು, ಜಾನುವಾರುಗಳಿಗೆ ಮೇವಿನ ಕೊರತೆಯಿದ್ದು, ಹಾಹಾಕಾರ ಎದ್ದಿದೆ. ಈವರೆಗೆ ಮೇವು ಬ್ಯಾಂಕ್, ಗೋಶಾಲೆಗಳನ್ನು ಆರಂಭಿಸಿಲ್ಲ. ನರೇಗಾ ಯೋಜನೆಯಲ್ಲಿ ಉದ್ಯೋಗ ನೀಡಿದ್ದರೂ ಸಮಯಕ್ಕೆ ಸರಿಯಾಗಿ ಕೂಲಿ ಪಾವತಿಸುತ್ತಿಲ್ಲ. ಇದರಿಂದ ಹೈದರಾಬಾದ್-ಕರ್ನಾಟಕ ಭಾಗದಲ್ಲಿ ಕಾರ್ಮಿಕರು ಗುಳೆ ಹೋಗುತ್ತಿದ್ದಾರೆ. ಕಾರ್ಮಿಕರಿಗೆ ಉದ್ಯೋಗ ನೀಡಿ ಗುಳೆ ನಿಯಂತ್ರಿಸುವ ಪ್ರಯತ್ನವೂ ನೆರಯುತ್ತಿಲ್ಲ. ಇದೊಂದು ರೈತ ಮತ್ತು ಕೂಲಿ ಕಾರ್ಮಿಕ ವಿರೋಧಿ ಸರಕಾರ ಎಂದು ಜರಿದರು. ಸಾಲಮನ್ನಾ ಮತ್ತು ಬರ ನಿರ್ವಹಣೆ ಕುರಿತು ಡಿ.10ರಂದು ರಾಜ್ಯ ವ್ಯಾಪಿ ಹೋರಾಟ ಹಮ್ಮಿಕೊಳ್ಳಲಾಗುವುದು.ಜತೆಗೆ ವಿಧಾನಸಭೆ ಅಧಿವೇಶನದಲ್ಲಿ ಈ ವಿಷಯವನ್ನು ಗಂಭೀರವಾಗಿ ಚರ್ಚಿಸಲಾಗುವುದು ಎಂದರು. ಇದೇವೇಳೆ ತಾವು ಪ್ರವಾಸ ಹಮ್ಮಿಕೊಂಡಿದ್ದರಿಂದ ಎಚ್ಚೆತ್ತುಕೊಂಡಿರುವ ಕೆಲ ಮಂತ್ರಿಗಳು 4 ತಂಡ ರಚಿಸಿಕೊಂಡು ರೈತರ ಜಮೀನುಗಳಿಗೆ ಭೇಟಿ ನೀಡುವ ಕಾರ್ಯಕ್ರಮ ಹಾಕಿಕೊಂಡಿದ್ದಾರೆ ಎಂದರು.

ಆಪರೇಷನ್ ಕ್ಲಿಪ್ಪಿಂಗ್ ಬೋಗಸ್: ಆಪರೇಷನ್ ಕಮಲ ವೀಡಿಯೋ ಕ್ಲಿಪ್ಪಿಂಗ್ ಬರಿ ಬೋಗಸ್. ಮೊದಲು ನಿಮ್ಮ ಮನೆ ಸರಿಯಿಲ್ಲ. ವಿನಾಕಾರಣ ಬೇರೆ ಮನೆಯತ್ತ ಬೊಟ್ಟು ಮಾಡುವುದು ಎಷ್ಟು ಸರಿ ಎಂದು ಕಾಂಗ್ರೆಸ್‌ಗೆ ಟಾಂಗ್ ಕೊಟ್ಟರು. ಈ ಸಂದರ್ಭದಲ್ಲಿ ಯಲಬುರ್ಗಾ ಶಾಸಕ ಹಾಲಪ್ಪ ಆಚಾರ್, ಶಂಕರಗೌಡ ಪಾಟೀಲ, ರಾಜ್ಯ ರೈತ ಮೋರ್ಚಾ ಅಧ್ಯಕ್ಷ ಈಶ್ವರಚಂದ್ರ ಹೊಸಮನಿ,ಬಿಜೆಪಿ ಜಿಲ್ಲಾಧ್ಯಕ್ಷ ಪಾಟೀಲ ಚನ್ನಬಸವನಗೌಡ, ತಾಲೂಕು ಅಧ್ಯಕ್ಷ ಎಂ.ಬಿ.ಬಸವರಾಜ, ಜಿ.ಪಂ. ಸದಸ್ಯರಾದ ಗುರುಸಿದ್ದಪ್ಪ, ತಾ.ಪಂ.ಸದಸ್ಯ ಟಿ.ಪ್ರಭಾಕರ, ಬಿಜೆಪಿ ಜಿಲ್ಲಾ ಪ್ರಧಾನ ಕಾರ್ಯದರ್ಶಿ ಪೂಜಪ್ಪ, ಸಂಜೀವರೆಡ್ಡಿ, ಓದೋ ಗಂಗಪ್ಪ ಹಾಗೂ ಇತರರಿದ್ದರು.

ಹಂಪಿ ಉತ್ಸವ ಜತೆಗೆ ಎಲ್ಲ ಉತ್ಸವಗಳೂ ನಡೆಯಬೇಕು. ಬರ ನೆಪದಲ್ಲಿ ಕೇವಲ ಹಂಪಿ ಉತ್ಸವವನ್ನು ರದ್ದುಪಡಿಸುವುದು ಸರಿಯಲ್ಲ. ಇದೊಂದು ಅಕ್ಷಮ್ಯ ಅಪರಾಧ. ಹಾಗಿದ್ದರೆ ಎಲ್ಲ ಉತ್ಸವ, ಜಯಂತಿಗಳನ್ನೂ ರದ್ದುಪಡಿಸಲಿ -ಜಗದೀಶ್‌ಶೆಟ್ಟರ್, ಮಾಜಿ ಸಿಎಂ

ಅಧಿಕಾರಿಗಳಾರೂ ಬಂದಿಲ್ಲ. ಮಳಿ ಹೋದ ಮ್ಯಾಲ ನಮ್ಮ ಹೊಲಕ್ಕ ಮೊದಲು ಕಾಲಿಟ್ಟವರು ನೀವಾ ನೋಡ್ರಿ. ಸಾವಿರ ಸುಳ್ಳು ಹೇಳಿ ಎಲೆಕ್ಸನ್‌ದಾಗ ಗೆದ್ದು ಹೋದಾರು ಇನ್ನೂವರೆಗೂ ಬಂದಿಲ್ಲ ಎಂದು ರೈತ ಹುಳಿಮಜ್ಜಿಗಿ ವೀರೇಶ, ಮಾಜಿ ಸಿಎಂ ಜಗದೀಶ್ ಶೆಟ್ಟರ್ ಅವರ ಬಳಿ ಅಳಲು ತೋಡಿಕೊಂಡರು.

:

LEAVE A REPLY

Please enter your comment!
Please enter your name here